राज्य मांय चौमासा री चोखी बिरखा व्हे रही है। मौसम महकमो सोमवार ने कोटा, बारां, सवाईमाधोपुर, करौली अर भरतपुर मांय भारी बारिश रो रेड अलर्ट जारी कीनो है। मौसम केन्द्र जयपुर रा निदेशक राधेश्याम शर्मा बतायो के जयपुर, अजमेर अर जोधपुर संभाग मांय ई कठे-कठे भारी बारिश रा आसार है। लारला 24 घंटां मांय राज्य रा ऊंगणी हलका मांय चोखो मेह बरस्यो। सब ऊं बत्ती 24 सेन्टीमीटर बिरखा कोटा ज़िला रा रामगंजमंडी मांय व्ही। म्हाणा कोटा खबरनवीस बतायो के पाणी भर जावण रे कारण केई गांव खास गेलां ऊं कट ग्या है। झालावाड़, टोंक, भीलवाड़ा, बारां, प्रतापगढ़ अर चित्तौड़गढ़ ज़िलां रा केई हलकां मांय व्ही भारी बारिश ऊं जिन्दगी माथे असर पड़्यो। धौलपुर मांय चम्बल नदी मांय पाणी रो लेवल खतरा रा निशाण 130 मीटर ने पार कर ग्यो है। प्रदेश रा तीन चौथाई बंधा-तळाव भर ग्या है। छोटा-मोटा 693 बंधां मांय ऊं 226 बंधा पूरा भर ग्या है, जद के 332 थोड़ा-घणा भर्या है। राज्य मांय ईं चौमासा मांय हाल तांई औसत ऊं 89 फीसदी बत्ती बिरखा व्हे चुकी है।