राज्य मांय चक्रवाती तूफान  मोन्था अर पश्चिमी विक्षोभ रा असर ऊँ केई ठौड़ां भारी बारिश रा आसार है। ईं बीचे करौली, बारां अर चित्तौडगढ़़ समेत केई ठौड़ां काल रात ऊँ ई रूक-रूक र बिरखा व्हे रही है। राजधानी जयपुर, माउंट आबू, डूंगरपुर, भरतपुर, डीग अर पाली ज़िला मांय ई आखा दिन छाटो-छिड़को चालतो रह्यो। दूजी कानी चूरू, बालोतरा अर बाड़मेर मांय आखा दिन बायरो बाजतो रह्यो। मौसम केंद्र, जयपुर रे मुजब सोमवार ने अर काल कोटा अर उदयपुर संभाग मांय कठे-कठे घणो ज़ोरदार मेह बरसबा री संभावना है। अजमेर, जोधपुर, जयपुर अर भरतपुर संभाग मांय ई कठे-कठे मझला ऊँ तेज़ दर्जा री बारिश व्हे सके है। इण ने ध्यान राखता थकां किसानां ने खुला मांय पड़्या अनाज अर खेती री जिन्सां ने गीली व्हेवण ऊँ बचावण री राय दीरीजी है। मौसम केन्द्र जयपुर रा निदेशक राधेश्याम शर्मा बतायो राज्य मांय 29 अक्टूबर ऊँ बिरखा कम व्हेवण रा आसार है। ईं बीचे भीलवाड़ा ज़िला मांय आज संवारे ऊं ई रिमझिम बारिश व्हे रही है। कृषि विभाग रा संयुक्त निदेशक विनोद कुमार जैन ईं बिरखा ने ईं महीना रा पहला सप्ताह मांय बोई ज्यी सरसों, चणा अर तारामीरा सरीखी साखां सारू वरदान बतायी है। वे कह्यो के आवता एक-दो दिन मांय और बरसात व्हेवण री सूरत मांय किसान बिना पाणत गेहूं अर जौ री बुवाई सरू कर सके है।