राज्य मांय घणखर ठौड़ां ज़बरदस्त गर्मी अर लू रो कोप बण्योड़ो है। हनुमानगढ़, बाड़मेर, पाली, करौली अर चूरू मांय उन्ना बायरा रा थपेड़ां ऊं आखा दिन परेशानी व्ही। श्रीगंगानगर मांय लोग शुक्रवार ने ई लू अर तेज़ गर्मी ऊं बेहाल रह्या। वठे काल ई अधिकतम तापमान 47 डिग्री सेल्सियस रे पार नापी ज्यो हो। म्हाणा खबरनवीस बतायो के झुलसा देवण वाळी गर्मी रे कारण दिन मांय ई सड़कां माथे आवाजाही कम रही। राज्य रा 16 ज़िला प्रचण्ड गर्मी अर लू री फेंट मांय रह्या। लारला चौबीस घंटां मांय सात ठौड़ां बीकानेर, चूरू, जैसलमेर, पिलानी, वनस्थली अर फलौदी मांय ई अधिकतम तापमान 45 डिग्री सेल्सियस ने पार कर ग्यो, हालांकि भीलवाड़ा, चित्तौड़गढ़, कोटा, बारां, बूंदी अर झालावाड़ ज़िलां मांय आंधी चाली अर हल्की बारिश व्ही। भीलवाड़ा ज़िला रा शाहपुरा मांय 30 मिलीमीटर बारिश दर्ज करी ज्यी। मौसम केन्द्र जयपुर रा निदेशक राधेश्याम शर्मा बतायो के उदयपुर अर कोटा संभाग रा कुछ हलकां मांय आवता तीन-चार दिन दोपहरां पाछे गरज़ सागे बारिश व्हेवण री संभावना है। जयपुर, भरतपुर अर अजमेर संभाग मांय ई कठे-कठे हल्की बारिश व्हे सके है।