प्रदेश मांय न्यारी-न्यारी ठोड़ां करड़ी गर्मी अर लू रो असर बण्योडो है। दिन रे साथे ई रात मांय ई करड़ी गर्मी ऊं आराम नी मिल रियो है। लारला 24 घंटां मांय चार शहरां रो तापमान 45 डिग्री रे सारे पूग ग्यो। सब ऊं बत्ती 46 डिग्री सैल्सियस बत्ती रो तापमान श्रीगंगानगर मांय दर्ज व्हीयो। पिलाणी, फलौदी अर चूरू समेत केई ठोड़ां हीटवेव रा हालात रिया। 31 दशमलव 8 डिग्री सैल्सियस रे साथे बीकानेर री रात सब ऊं बत्ती गर्म री। हनुमानगढ़, सवाईमाधोपुर अर सलूम्बर मांय दिन मांय बजारां मांय सन्नाटो पसर्यो रियो। भीलवाडा मांय बादळ छायी ज्या रेहवण रे बावदूज गर्मी रो असर बण्योडो है। वठे ई बालोतरा मांय ई तेज गर्मी रे कारण सड़कां सूनी री। मौसम महकमो आवता तीन-चार दिनां मांय तापमान मांय बढ़वार अर हीटवेव रा हालात री आस जतायी है। मौसम विज्ञान केंद्र जयपुर मुजब आवता चार-पांच दिन बीकानेर, जोधपुर संभाग अर शेखावाटी रा कुछ हलकां मांय हीटवेव रो दौर चालता रेहवण री आस है। उदयपुर, कोटा अर भरतपुर संभाग मांय सोमवार ऊं आवता चार-पांच दिन कठे-ई-कठे हल्की बिरखा अर आंधी चालण री आस है।