राज्य मांय केई ठौड़ां ज़ोरदार मेह बरस रह्यो है। जयपुर मांय संवारे री पोर तीन- चार घंटा तांई बरस्या पाणी रे कारण केई हलकां मांय पाणी भर ग्यो। जिला कलेक्टर जितेन्द्र सोनी न्यारा-न्यारा हलकां रो दौरो कर र हालात रो जायजो लीनो। डीग अर भरतपुर मांय ई जोरदार बिरखा रा समाचार है। बारां मांय आखा दिन रूक-रूक मेह बरसतो रह्यो। पाली ज़िला रा सादड़ी, मारवाड़ जंक्शन अर रानी मांय मूसलाधार बरसात रा समाचार है। अजमेर मांय लगातार व्हे रही तेज़ बारिश ऊं जिन्दगी माथे घणो असर पड़्यो है। म्हाणी खबरनवीस बतायो के विधानसभा अध्यक्ष वासुदेव देवनानी अर विधायक अनीता भदेल अहलकारां सागे हालात माथे निजर बणायोड़ा है। करौली मांय ई तेज़ बारिश रे कारण जिला मुख्यालय अर हिण्डौनसिटी रा नीचला हलकां मांय पाणी भर ग्यो। मंत्री झाबर सिंह खर्रा पाणी भर्या हलकां रो दौरो कर र हालात रो जायजो ले रह्या है। पांचना बांध रा तीन दरूजा खोल र पाणी निकाळ्यो जा रह्यो है। जोधपुर मांय ई आज दोपहरां री बगत व्ह्या जोरदार मेह पाछे नीचला हलकां मांय पाणी भर ग्यो। टोंक मांय बीसलपुर बंधा रा 6 दरूजा खोल र बत्तो पाणी निकाळ्यो जा रह्यो है। सवाईमाधोपुर, दौसा, नागौर, कोटा अर झालावाड़ समेत केई ज़िलां ऊं ई तेज़ बरसात व्हेवण रा समाचार मिल्या है। ईं बीचे केन्द्रीय मंत्री गजेन्द्र सिंह शेखावत अहलकारां ने पोकरण अर जैसलमेर हलका मांय घणी बिरखा रे कारण व्ह्या नुकसाण रो सर्वे कर र संबंधित परिवारां ने मदद दिरावण रा हुकम दीना। वे फलसूण्ड अर फूलासर हलका मांय भर्या पाणी ने बेगो ई निकाळबा रा हुकम ई दीना। मौसम विभाग रे मुजब लारला 24 घंटां मांय 30 ऊं बत्ती ठौड़ां भारी बरसात व्ही । मौसम केन्द्र जयपुर रा निदेशक राधेश्याम शर्मा बतायो के जयपुर, कोटा, अजमेर अर उदयपुर संभाग मांय आवता 48 घंटा मांय कठे-कठे घणी जोरदार बिरखा व्हेवण रा आसार है।