प्रदेश मांय न्यारी-न्यारी ठौड़ां माथे शीतलहर चालबा सूं कड़ाका री ठण्ड रो दौर चाल रह्यो है। सीकर रा फतेहपुर मांय सोमवार ने दूजा दिन भी पारो शून्य सूं नीचे दर्ज कर्यो गयो। इण रे अलावा पारो बीकानेर रा लूणकरणसर मांय शून्य दशमलव चार डिग्री सेल्सियस रियो। श्रीगंगानगर, चूरू, जैसलमेर, झुंझुनूं, दौसा, करौली अर अलवर मांय रात रो तापमान 3 डिग्री सेल्सियस सूं नीचे रह्यो। झुंझुनूं फलौदी अर सीकर रा पलसाना मांय केई ठौड़ां माथे फसलां माथे बर्फ री हल्की परत जमी। वठी ने जैसलमेर अर कोटपूतली-बहरोड़ मांय गाड़ियां माथे भी बर्फ री हल्की परत निजर आई। मौसम महकमा रे मुजब इण टेम रात रे सागे दिन मांय भी ठिठुरन व्हे री है। ठण्डी हवावां री वजह सूं दिन रो तापमान सामान्य सूं 5-6 डिग्री सेल्सियस नीचे दर्ज कर्यो जा रह्यो है। इण सूं केई हलकां मांय कोल्ड डे रा हालात बण रिया है। इण बीच मौसम केन्द्र जयपुर रा निदेशक राधेश्याम शर्मा बताया के प्रदेश री न्यारी-न्यारी ठौड़ां माथे शीतलहर रा हालात हाल भी जारी रह सके है। कड़ाका री ठण्ड रे चालता जयपुर समेत 11 जिलां मांय स्कूल री छुट्टियां बढ़ा दीनी है। वठी ने कुछेक जिलां मांय स्कूलां रो टेम बदल दियो है।