राज्य मांय ईं चौमासा री रूत मांय हाल तांई 671 मिलीमीटर ऊं बत्ती बिरखा व्हे चुकी है जो सामान्य ऊं करीब 58 फीसदी बत्ती है। राज्य रा ऊगणी हलका मांय सामान्य ऊं 49 फीसदी जद के आतूणी हलका मांय सामान्य ऊं 75 फीसदी बत्ती बिरखा व्ही है। दौसा मांय सब ऊं बत्तो 1 हजार 402 मिलीमीटर मेह बरस्यो। प्रदेश रा कुछ हलकां मांय गुरूवार ने ई बिरखा व्ही। राजधानी जयपुर रा केई हलकां मांय छांटो-छिड़को अर हल्की बरसात व्ही। झालावाड़ मांय दोपहरां पाछे चोखो मेह बरस्यो। जालौर मांय ई तेज़ बारिश व्ही। सवाई माधोपुर मांय आखा दिन बादळा मण्ड्या रेहवण पाछे बिरखा व्ही। दौसा, सीकर, चूरू, करौली अर अलवर जिलां मांय ई छांटा-छिड़का अर हल्की बारिश रा समाचार है। मौसम विभाग आवता चार-पांच दिन ऊगणी ज़िलां मांय चौमासा री बिरखा व्हेती रेहवण रा आसार जताया है जद के आतूणी ज़िलां मांय आवता दो दिन बिरखा व्हेवण री संभावना है।