राज्य मांय आवता दो सप्ताह तांई चौमासा री बिरखा रो दौर चालतो रेहवण रा आसार बीचे 10 सितम्बर तांई औसत ऊं बत्ती बारिश व्हे सके है। मॉनसून री लकीर गंगानगर रा ऊपर ऊं व्हेती थकी कम दबाव रा सिस्टम ऊं निकळ रही है। इण रा असर ऊं राज्य मांय आवता दिनां चोखो मेह व्हेवण रा आसार है। राज्य रा ऊगणी अर आतूणी हलका मांय केई ठौड़ां हल्की ऊं मझला दर्जा री बरसात व्हे रही है, जद के कठे-कठे भारी बिरखा ई व्हे रही है। मौसम विभाग शुक्रवार ने जैसलमेर, जोधपुर, बाड़मेर, उदयपुर अर बांसवाड़ा समेत 11 ज़िलां मांय बिरखा रो येलो अलर्ट जारी कीनो है। ईं बीचे शुक्रवार ने दोपहरां राजधानी जयपुर रा केई हलकां मांय चोखो मेह बरस्यो। पाली ज़िला रा सेवाडी, मुण्डारा, फालना, बाली अर देसूरी समेत केई हलकां मांय चोखो मेह बरस्यो। भीलवाड़ा मांय ईं झमाझम बिरखा व्ही। सलूम्बर ज़िला रा सराड़ा, सेमारी अर जयसमंद मांय ई ज़ोरदार पाणी बरस्यो। भारी बारिश रे कारण नदी-नाळां मांय पाणी उफण रह्यो है अर हादसां रो खतरो बध ग्यो है। इण ने ध्यान राखता थकां सलूम्बर रा एस.पी. राजेश कुमार यादव जनता ऊं सावचेती राखण री अपील कीनी है। लारला चौबीस घंटा मांय सब ऊं बत्तो 13 सेंटीमीटर पाणी बांसवाड़ा ज़िला रा सज्जनगढ मांय बरस्यो। झालावाड़ ज़िला रा डग मांय 11 सेंटीमीटर बरसात व्ही। नागौर, बारां, भरतपुर, बूंदी, सीकर, कोटा, झालावाड़ अर डूंगरपुर मांय ई चोखी बिरखा रा समाचार है। कोटा, उदयपुर, भरतपुर, अजमेर बीकानेर, जोधपुर अर जयपुर संभाग मांय काल कठे-कठे बारिश री संभावना है। ईं बीचे चित्तौड़गढ़ री रूपारेल नदी मांय एक ही पिरवार रा पांच जणा बह ग्या, ज्या मांय ऊं तीन जणा ने हिफ़ाजत सागे निकाळ लिया ज्या जद के दो जणां रो हाल ई पतो नी लाग्यो है, ज्यां री तलाश करी जा रही है। डी.एस.पी. अंजलि सिंह बतायो के पारसोली हलका रा हाड़ों का खेड़ा गांव रो एक जणो पिरवार सागे मोटरसाईकिल माथे सवार व्हे र जा रह्यो हो, जो चौसला पुलिया माथे पाणी रा ज़ोरदार हलोऴा मांय बह ग्यो। झुंझुनू ज़िला रा उदयपुर वाटी मांय ई कुण्ड मांय डूब जावण ऊं दो जणां री मौत व्हे ग्यी। उदयपुरवाटी थाना प्रभारी बतायो के हादसो छापोली गांव रा कदंब कुंड मांय खुद री फोटो खींचण रे दौरान रपट जावण रे कारण व्ह्यो। अ लोग उत्तरप्रदेश रा बुलंदशहर रा रहवासी हा ज्यो सैर-सपाटा सारू राजस्थान आया हा।