राज्य मांय आवता एक-दो दिन मांय चौमासा री बिरखा सरु व्हेवण रा आसार है। मौसम विभाग रे मुजब गुजरात अर आरे-सारे रा हलका माथे बण्या कम दबाव रा क्षेत्र रे कारण राज्य रा लंकाऊ हलका रे गेले चौमासा री बिरखा सरू व्हेवण बाबत् हालात अनुकूल है। राज्य मांय घणखर ठौड़ां काल हल्की ऊं मझला दर्जा री बिरखा री संभावना है जदके आवता 4-5 दिन मांय उदयपुर अर कोटा संभाग मांय कठे-कठे भारी बारिश रा आसार है। ईं बीचे मंगलवार ने करौली, बाड़मेर, जैसलमेर, पाली, झालावाड़ अर चूरू मांय कठे-कठे चोखो मेह बरस्यो। भरतपुर मांय दोपहरां पाछे तेज अंधड सागे व्ही बिरखा ऊं केई ठौड़ां टीन-टप्पर उड़ ग्या अर होर्डिंग्स पड़ ग्या। डीग मांय ई मेह रा समाचार है। म्हाणी हनुमानगढ़ खबरनवीस बतायो के तेज बिरखा रे कारण केई ठौड़ां पाणी भर ग्यो। लारला चौबीस घंटां मांय राज्य मांय केई ठौड़ां चोखो मेह बरस्यो। सब ऊं बत्तो साढे 7 सेंटीमीटर पाणी सीकर मांय बरस्यो।