राज्य मंत्रिमण्डल अशांत घोषित खेतरां मांय स्थायी निवासियां री सम्पतियां अर किरायादारां रे अधिकारां री रक्षा खातिर विधेयक लाणे, एयरोस्पेस अर रक्षा विनिर्माण तथा सेमीकंडक्टर रे खेतर मांय नुवी नीतियां रे अनुमोदन समेत केई महत्ती फैसला करया है। मुख्यमंत्री कार्यालय मांय आज व्ही मंत्रिमंडल री बैठक रे पाछे उद्योग मंत्री कर्नल राज्यवर्धन राठौड, संसदीय कार्य मंत्री जोगाराम पटेल अर खाद्य और नागरिक आपूर्ति मंत्री सुमित गोदारा संयुक्त प्रेस वार्ता करी। संसदीय कार्य मंत्री जोगाराम पटेल बतायो कि जनसंख्या असंतुलन रा हालात बणणे सूं सार्वजनिक व्यवस्था, सद्भाव अर मेलजोल सूं रेहणे रो सामुदायिक चरित्र माथे असर पड़े है। ऐड़ा खेतरां मांय दंगा, भीड़ कानी सूं हिंसा सूं अशांति रा हालात पैदा होणे माथे उण खेतर रा स्थायी निवासियां ने आपरी स्थायी सम्पतियां कम दामां माथे बेचणे पर मजबूर होणो पड़े है। इने रोकणे खातिर कानूण बणायो जावेला।
श्री पटेल बतायो कि इण विधेयक रे पारित होवण रे पाछे राज्य मांय अशांत घोषित खेतर मांय स्थाई निवासियां री सम्पत्तियां अर इण सम्पत्तियां माथे किरायेदारां रे अधिकारां ने संरक्षण प्रदान करयो जा सकेला। इण विधेयक ने अबे विधानसभा रा आवता सत्र मांय राख्यो जावेला। उद्योग अर वाणिज्य मंत्री श्री राठौड़ बताया कि कैबिनेट रक्षा अर अंतरिक्ष प्रौद्योगिकी ने प्रोत्साहन देणे रे साथे प्रदेश ने एयरोस्पेस अर डिफेन्स मैन्युफैक्चरिंग रो हब बणाणे रे लगस सूं राजस्थान एयरोस्पेस एण्ड डिफेन्स पॉलिसी रो अनुमोदन करयो है। एमएसएमई स्टार्टअप्स अर नवाचार आधारित इकोसिस्टम ने विकास माथे केन्द्रित इण नीति रे तैत प्रदेश मांय एयरोस्पेस एण्ड डिफेन्स खेतर रे विनिर्माण उद्यमां, उपकरण अर घटक निर्मातावां सूं जुड़ी इकाइयां ने बधावो दियो जावेला।
कर्नल राठौड़ बताया कि कैबिनेट प्रदेश री पहली राजस्थान सेमीकंडक्टर पॉलिसी ने भी मंजूरी दी है। आ राज्य को सेमीकंडक्टर विनिर्माण, डिजाइन, पैकेजिंग अर संबद्ध इलेक्ट्रॉनिक्स रे खेतर मांय देश रो प्रमुख केन्द्र बणाणे री दिशा मांय महत्ती कदम है।

खाद्य अर नागरिक आपूर्ति मंत्री सुमित गोदारा बतायो के काश्तकारां अर पशुपालकां ने न्यारी-न्यारी कल्याणकारी योजनावां रो लाभ देवण खातिर प्रदेश हर गिरदावर सर्किल माथे 23 जनवरी सूं ग्राम उत्थान शिविरां रो आयोजन कर्यो जावेला। श्री गोदारा बतायो कि मंत्रिमंडल ने सौर परियोजनावां खातिर बीकानेर अर जैलसमेर मांय भूमि आवंटन ने भी मंजूरी दी है। वणा बतायो कि 23 जनवरी ने बसंत पंचमी माथे प्रदेश रा सगळा सरकारी स्कूलां मांय एक साथे मेगा पीटीएम रो आयोजन करयो जावेला।

कैबिनेट रा फैसलां माथे प्रतिक्रिया जताता थकां प्रदेश कांग्रेस अध्यक्ष गोविंद सिंह डोटासरा कयो कि अशांत क्षेत्र घोषित करणे संबंधी कानून लाणे रो राज्य मंत्रिमंडल रो फैसलो समानता रे अधिकार रो उल्लंघन होगा। वणा कयो कि ऐडो करणे सूं ब्यूरोक्रेसी निरंकुश व्हेला अर वठे रा नागरिकां रे साथे न्याय नी हो पावेला।