राज्य मंत्रिमंडल अर मंत्रीपरिषद् री मुख्यमंत्री भजन लाल शर्मा री सदारत मांय बुधवार ने मीटिंग व्ही जिण मांय प्रवासी राजस्थानी नीति, राजस्थान ट्रेड प्रमोशन नीति अर राजस्थान पर्यटन नीति 2025 समेत केई खास फैसला करी ज्या। मीटिंग पाछे संसदीय कार्य अर विधि मंत्री जोगाराम पटेल, नागरिक आपूर्ति मंत्री सुमित गोदारा सागे खबरनवीसां ने मीटिंग मांय करी ज्या फैसलां री जाणकारी दीनी। श्री पटेल बतायो के मंत्रिमंडल राजस्थान जन विश्वास अध्यादेश ने मंजूरी दे दीनी है। ईं रा तैत 11 कानूनां मांय बदलाव करी ज्या है अर कुछ कानूनां मांय सज़ा रा प्रावधानां री ठौड़ जुर्मानो बधायी ज्यो है। वे बतायो के ईं अध्यादेश रो मकसद ईज़ ऑफ लिविंग अर ईज़ ऑफ़ डूइंग बिजनेस ने बधावो देवणो है। पटेल बतायो के रूंखड़ा काटण परां जुर्माना री रकम 100 ऊँ बधा र 1 हजार रुप्या करी ज्यी है। श्री पटेल बतायो के कैबिनेट किशनगढ़ ने जयपुर रा वैकल्पिक हवाई अड्डा रा तौर ऊँ विकसित करण सारू 15 एकड़ ज़मीं मुफ़्त देवण रो फैसलो कीनो। वे बतायो के सरकारी नौकरियां मांय वेटिंग लिस्ट री वैधता री मियाद 6 महीना ऊँ बधा र एक साल करण रो फैसलो करी ज्यो है। ईं सागे ई कैबिनेट अनुकंपा नियुक्ति रा मामला मांय मरण वाळा कर्मचारी रा पिरवार वाळां कानी ऊँ 90 दिन री बजाए 180 दिन तांई अर्जी देवण ने ई मंजूरी दीनी।