राज्यसभा मांय ऑपरेशन सिंदूर रा बारा मांय चर्चा चाल रही है। चर्चा मांय सिरकत करता थकां विदेश मंत्री डॉ. एस जयशंकर ऑपरेशन सिंदूर रोकण सारू बीच बचाव रा दावां ने गलत बताता थकां कह्यो के 22 अप्रैल ऊं 16 जून 2025 बीचे प्रधानमंत्री नरेंद्र मोदी अर अमरीका रा राष्ट्रपति डोनाल्ड ट्रंप बीचे फोन रे जरिये कोई बातचीत नी व्ही। ऑपरेशन सिंदूर री कामयाबी रो जिक्र करता थकां वे कह्यो के ईं ऑपरेशन ऊं पाकिस्तान मांय बहावलपुर अर मुरीदके सरीखा मोटा आतंकवादी केंद्रां ने घणो नुकसाण पूगायी ज्यो। विदेश मंत्री कह्यो के पहलगाम आतंकी हमला पाछे हिफ़ाजती मामलात री कैबिनेट समिति री मीटिंग मांय सब ऊं पैली पाकिस्तान कानी ऊं आतंकवाद री हिमायत बिल्कुल बंद करण तांई सिंधु जल संधि ने टाळ देवण रो फैसलो करी ज्यो। चर्चा मांय सिरकत करता थकां सदन रा नेता जे.पी. नड्डा पहलगाम आतंकी हमला री निंदा कीनी। वे कह्यो के गृह मंत्री अमित शाह आतंकी हमला वाळा ई दिन जम्मू-कश्मीर री राजधानी श्रीनगर पूग ग्या हा अर प्रधानमंत्री नरेंद्र मोदी सऊदी अरब रो दौरा बीच मांय ई छोड़ र पाधा आ ग्या हा। वे कह्यो के ओ सरकार री संवेदनशीलता ने बतावे है। श्री नड्डा सशस्त्र बलां अर सुरक्षा एजेंसिया रा काम री सराहवणा करता थकां कह्यो के मौजूदा एन.डी.ए. सरकार आतंकवाद ऊं करड़ायी ऊं निपट रही है।