राज्यपाल हरिभाऊ बागड़े संविधान दिवस रे मौके जनता ऊं अधिकारां रा प्रति जागरूक रहता थकां कर्तव्य निभावणो तैय करण बाबत् कह्यो है। मंगलवार ने मनाया जावण वाळा संविधान दिवस री शुभकामनावां देता थका राज्यपाल कह्यो के संविधान रो मूल भाव इन्सानियत है। ईं बीचे प्रदेश मांय ई संविधान दिवस रे मौके न्यारा-न्यारा कार्यक्रम राख्या जावेला। जयपुर मांय संविधान क्लब ऊं अंबेडकर सर्किल तांई पदयात्रा निकाळी जावेला। कार्यक्रम मांय फौज, राजस्थान पुलिस, आरएसी अर गैर सरकारी स्कूलां विद्यार्थियां री ओर ऊं बैंडवादन कर्यो जावेला। पर्यटन विभाग री मदद ऊं पदयात्रा रा गेला मांय न्यारी-न्यारी ठौड़ां सांस्कृतिक कार्यक्रम ई राख्या जावेला अर खुद री फोटो खींचण री ठौड़ां बणायी जावेला। सवाईमाधोपुर रा सूचना केंद्र मांय प्रदर्शनी अर संगोष्ठी रा कार्यक्रम राख्या जावेला।