राजस्थान लोक सेवा आयोग-आरपीएससी फर्जी दिव्यांगता प्रमाण पत्र रा मामलां ने ध्यान राखता थकां भर्ती प्रक्रिया मांय मेडिकल जांच रो प्रावधान कीनो है। आर.ए.एस. भर्ती 2023 मांय पहली दफा मेडिकल जांच ई करी जा रही है। ध्यानजोग है के ईं पहल ऊं शंका लायक सर्टिफिकेट वाळा केई उम्मीदवार मेडिकल जांच मांय शामिल नी व्हे रह्या है। आयोग सामी ऐड़ा केई मामला आया है, ज्यां मांय उम्मीदवार वां री श्रेणी दिव्यांग ऊं सामान्य करण री अर्जी दीनी। आर.पी.एस.सी. रा अध्यक्ष उत्कल रंजन साहू बतायो के ईं कदम ऊं भर्ती प्रक्रिया मांय साफगोई आवेला। ईं सागे ई फर्जी सर्टिफिकेट रे पाण दिव्यांग अर दूजी श्रेणियां रो गैर-कानूनी तरीका ऊं फ़ायदो लेवण वाळां माथे ई लगाम लागेला।