राज्य रा न्यारा-न्यारा हलका मांय आज ई मेह बरस्यो। केई जिलां मांय आज हल्की ऊं मझला दर्जा री बिरखा रा समाचार है। जयपुर मांय छांटो-छिड़को व्ह्यो। डूंगरपुर जिला मांय ई आज मेह बरस्यो। लारला दो दिन ऊं व्हे रही बारिश ऊं नदी-नाळां मांय पाणी उफण रह्यो है। चूरू मांय ई चोखो मेह बरस्यो। जैसलमेर मांय ई सिंज्या री पोर छांटो छिडको व्ह्यो। लारला 24 घंटा मांय बांसवाड़ा अर डूंगरपुर जिलां मांय केई ठौड़ां जदके जयपुर अर उदयपुर मांय कठे-कठे भारी बिरखा दर्ज करी ज्यी। बांसवाड़ा जिला रा बागीदौरा मांय सब ऊं बत्ती 202 मिली मीटर बरसात दर्ज करी ज्यी। मौसम केंद्र जयपुर कानी ऊं मिली जाणकारी रे मुजब उदयपुर अर जोधपुर संभाग मांय आवता 48 घंटां रे दौरान कठे-कठे ज़ोरदार बायरो बाजण सागे रुक-रुक र बिरखा व्हेवण तो कठे-कठे भारी बारिश रा आसार है। बीकानेर, भरतपुर, जयपुर अर अजमेर संभाग रा कुछ हलकां मांय आवता दो-तीन दिन बादळां री गाज सागे बिरखा रा आसार है। ईं बीचे सवाईमाधोपुर जिला रा बौंली मांय आज किसान घणी बिरखा रे कारण साखां ने व्ह्या नुकसाण रो मुआवजो दिरावण सारू गिरदावरी करावण री मांग कीनी है।