राज्य मांय शुक्रवार ने ई न्यारा-न्यारा हलका मांय मेह बरस्यो। डूंगरपुर मांय दोपहरां री बगत हल्की बारिश व्ही। श्रीगंगानगर अर सूरतगढ़ मांय संवारे ऊं ई हल्की बरसात रो सिलसिलो चाल रह्यो है। टोंक मांय छांटा-छिड़का रा समाचार है। धौलपुर मांय आज दोपहरां पाछे करीब एक घंटा तांई व्ही जोरदार बिरखा ऊं केई हलकां मांय पाणी भर ग्यो। लगातार बिरखा ऊं आ रह्या बत्ता पाणी रे कारण आंगई बांध रा चार दरूजा खोल र बत्तो पाणी निकाळ्यो जा रह्यो है। इण ऊं पार्वती नदी कने रा केई गांवां रो संपर्क टूट ग्यो है। शाहपुरा मांय ई दोपहरां पाछे चोखो मेह बरस्यो। बांसवाड़ा मांय ई आज चोखो मेह बरस्यो। जालौर अर आहोर मांय ई चोखी बिरखा रा समाचार है। जोधपुर ग्रामीण जिला रा पीपाड़, भोपालगढ़ अर बावड़ी उपखंड हलकां मांय बिरखा व्ही।भोपालगढ़ रा नाड़सर गांव मांय घणी बिरखा रे कारण गळ रही साखां रा मुआवजा बाबत् किसान गिरदावरी री मांग कीनी है। दूजी कानी सांचौर मांय बादळां री आवाजाही बीचे आज उमस रही। ईं बीचे भीलवाड़ा ज़िला मांय आसींद उपखंड रा शंभूगढ़ कने बह रही खारी नदी मांय डूब जावण ऊं एक जणा री मौत व्हे ग्यी, जिण री लाश निकाळ लीरीजी है जद के पाणी मांय बह्या एक और जणा री तलाश करी जा रही है। पाली मांय ई करीब 1 घंटा तांई जोरदार मेह बरस्यो। ज़िला रा सोजत कने सुरायता गांव मांय बरसाती नाळा मांय डूब जावण ऊं एक जणा री मौत व्हे ग्यी। जैसलमेर ज़िला रा रामदेवरा मांय राम सरोवर मांय डूब जावण ऊं एक जातरू री मौत व्हे ग्यी। मौसम केन्द्र जयपुर रा निदेशक राधेश्याम शर्मा बतायो के अरब सागर मांय एक और कम दबाव रा हलका रे कारण राज्य मांय ई बिरखा चालती रेहवण रा आसार है।