राजस्थान मांय केई ठोड़ां ज़ोरदार मेह बरस्यो है। टोंक ज़िला रा लांबा हरिसिंह मांय साढे 23 सेंटीमीटर जदके झालावाड ज़िला रा खानपुर मांय करीब 20 सेंटीमीटर बरसात व्ही। अजमेर, भीलवाड़ा, कोटा अर बारां मांय ई कठे-कठे तेज बारिश रा समाचार है। कोटा हलका रा केई कस्बां मांय व्ही ज़ोरदार बिरखा पाछे नीचली बस्तियां मांय पाणी भर ग्यो है। ज़ोरदार बारिश पाछे केई ठोड़ां जिन्दगी माथे असर पड़्यो है अर गांवाई हलकां रो खास गेलां ऊं सम्पर्क कट ग्यो है। हाड़ौती हलका मांय बरस रह्या ज़ोरदार मेह पाछे बंधा मांय भारी तादाद मांय आ रह्या पाणी ने ध्यान राखता थकां बत्तो पाणी निकाळ्यो जा रह्यो है, जिण ने ध्यान राखता थकां कोटा ऊं धौलपुर तांई अलर्ट जारी करी ज्यो है। कोटा बैराज, राणा प्रताप सागर अर भीम सागर बंधा ऊं पाणी छोड़्यो जा रह्यो है। चित्तौडगढ मांय आज दोपहरां तांई रुक-रुक र बिरखा व्हेती रही। म्हाणा खबरनवीस बतायो के ज़िला मांय व्हे रही झमाझम बिरखा पाछे राणा प्रताप सागर बंधा रा दरूजा खोल दिया ज्या है अर हलका रा केई छोटा-मोटा बंधा अर तळाव लबालब भर ग्या है। मौसम विभाग आज 11 ज़िलां मांय कठे-कठे भारी बारिश रो ऑरेंज अलर्ट जारी कीनो है।