प्रदेश मांय कठे-कठे आज ई जोरदार मेह बरस्यो। मौसम केन्द्र जयपुर ऊं मिली जाणकारी रे मुजब सब ऊं बत्ती 13 सेंटीमीटर बिरखा बांसवाड़ा जिला रा भूंगड़ा मांय दर्ज करी ज्यी। ई रे अलावा माउंट आबू मांय 12 सेंटीमीटर, कुशलगढ मांय 11, प्रतापगढ मांय 10, कपासन अर धौलपुर मांय 9-9, रामगंज मण्डी मांय 8, झाडोल, डग, पीपलखूंट, जयपुर, लोहारिया, मनोहर थाना, मारवाड जंक्शन अर देसूरी मांय 7-7 सेंटीमीटर पाणी बरस्यो। जयपुर अर आरे-सारे रा हलकां मांय दिन मांय हल्की बरसात व्ही। जालौर जिला रा जसवंतपुरा मांय लगातार 2 घंटा तांई मूसलाधार बारिश व्ही। ईं दौरान हलका रा सुंधा माता मिंदर मांय दर्शन करण सारू गयी गुजरात री एक महिला री पाणी मांय बह जावण ऊं मौत व्हे ग्यी। बाड़मेर जिला मांय केई ठौड़ां मध्यम ऊं तेज पाणी बरस्यो। झालावाड अर पाली मांय सिंज्या री पौर तेज बरसात व्ही। चित्तौडगढ़ मांय व्ही बिरखा पाछे तीन नान्हा बंधा माथे चादर चाल ग्यी है। ईं बीचे मौसम विभाग कह्यो है के आज कम दबाव रो हलको मध्यप्रदेश रा पूर्वी भागां रा ऊपर बण्योड़ो है। इण रे आवता 24 घंटा मांय मध्य प्रदेश ऊं व्हेता थकां दक्षिण-पूर्वी राजस्थान ओड़ी बधबा अर तेज व्हेवण रा आसार है। ईं तंत्र रा असर ऊं कोटा, उदयपुर अर जोधपुर संभाग मांय केई ठौड़ां आवता दो दिनां रो दौरान भारी ऊं घणी भारी बारिश व्हेवण री संभावना है।