राजस्थान बस ऑपरेटर एसोसिएशन परिवहन विभाग कानी ऊं करी जा रही सख्ती रे खिलाफ शुक्रवार ने रात 12 बज्यां ऊं प्रदेश मांय चालण वाळी सगळी स्लीपर बसां बंद करण रो ऐलाण कीनो है। इण ऊं प्रदेश रा न्यारा-न्यारा शहरां अर दिल्ली, गुजरात, महाराष्ट्र, उत्तरप्रदेश, हरियाणा अर मध्यप्रदेश बीचे चालण वाळी करीब 8 हजार बसां बंद व्हे जावेला।
एसोसिएशन रा अध्यक्ष सत्यनारायण साहू आकाशवाणी ने बतायो के जोधपुर, भीलवाड़ा अर उदयपुर समेत केई ठोडां ऊं थावर रात ऊं ईं स्लीपर बसां री आवण-जावण बंद व्हे ग्यी ही, जदके जयपुर अर कोटा समेत न्यारा-न्यारा शहरां मांय शुक्रवार ने रात ऊं स्लीपर बसां रा मालिक हड़ताल करेला।
दूजी कानी परिवहन विभाग रे मुजब मुसाफिरां री हिफाजत ऊं जुड़्या नियमां री पालना नी करण वाळा बस मालिकां रे खिलाफ कार्रवाई चालती रेहवेला। महकमा रा अतिरिक्त आयुक्त ओ पी बुनकर कह्यो के मोटरगाड़ियां री आवण-जावण ऊं जुड़या नियमां री पालना जरूरी है अर मुसाफिरां री हिफाजत ऊं खिलवाड़ नी कर्यो जा सके है।