रक्षा मंत्री राजनाथ सिंह कह्यो है के बच्चां ने दिमागी तौर ऊं मज़बूत बणावण अर वां रा अध्यात्मिक विकास माथे ध्यान देवणो ज़रूरी है। रक्षा मंत्री सोमवार ने जोधपुर मांय आदर्श डिफेन्स अर स्पोर्ट्स एकेडमी रा पहला दौर रो काम जनता ने सूंपण रे मौके राख्यी ज्या कार्यक्रम मांय बोल रह्या हा। वे कह्यो के विद्यार्थियां मांय समाज अर देश रा भला सारू काम करण री सोच विकसित करणी चाहिजे। रक्षा मंत्री ईं संस्थान ने रक्षा अर शिक्षा रो संगम बतायो। ईं मौके केन्द्रीय पर्यटन अर संस्कृति मंत्री गजेन्द्र सिंह शेखावत कह्यो के ओ केन्द्र बच्चां मांय अनुशासन अर देश री सेवा रा नुवा गेला बतावेला अर दूर-दराज रा गांवां रा बच्चां रा सपना ईं रे मार्फत पूरा व्हे सकेला। लाल सागर परियोजना रा नाम ऊं विकसित करी जा रही ईं एकेडमी रा काम माथे करीब 110 करोड़ रूप्या खर्च व्हेला। ईं रा पहला दौर मांय 30 करोड़ रूप्या रा खर्च ऊं छात्रावास बणायी ज्यो है, जिण मांय 400 ऊं बत्ता विद्यार्थी रह सकेला। ईं छात्रावास मांय रहवण वाळा 200 विद्यार्थियां ने रक्षा अर 200 ई विद्यार्थियां ने खेल रा हलका सारू तैयार कर्या जावेला।