युवा मामलात् अर खेल मंत्रालय री ओर ऊं मेरा युवा भारत पहल रा तैत तिरंगा झण्डा ऊं जुड़ी सवाल-जवाब री ऑनलाइन होड़ सरू करी ज्यी है। आप माय भारत पोर्टल माथे ईं होड़ मांय शामिल व्हे सको हो। होड़ मांय पहली ऊं 25 वी ठौड़ माथे रहवण वाळां ने सियाचिन रो दौरो करायो जावेला अर होड़ मांय शामिल व्हेवण वाळा सगळा लोगां ने ई-सर्टिफिकेट दिया जावेला। प्रदेश मांय ई हर घर तिरंगा अभियान रा तैत भांत भांत रा कार्यक्रम राख्या जा रह्या है। जयपुर मांय भारतीय जनता पार्टी रा प्रदेश कार्यालय मांय हर घर तिरंगा अभियान अर विभाजन विभीषिका स्मृति दिवस रा बारा मांय कार्यशाला राख्यी ज्यी। ईं मौके मुख्यमंत्री भजनलाल शर्मा कह्यो के तिरंगा यात्रा रे मार्फत नुवी पीढ़ी ने स्वतंत्रता सेनानियां रो बलिदान याद करावणो है। वे कह्यो के देश रा प्रति लगाव बधावण सारू हर घर तिरंगा अभियान ज़रूरी है। बाड़मेर ज़िला रा डिंडावा री सरकारी स्कूल मांय टाबरियां तिरंगा रंगोली बणा र देश प्रेम रो संदेश दीनो।