मौसम विभाग शुक्रवार ने अजमेर, भीलवाड़ा, बूंदी, कोटा, टोंक अर पाली मांय भारी बारिश रो रेड अलर्ट जारी कीनो है। ईं सागे ई नौ ज़िलां मांय तेज बरसात रो ऑरेंज अलर्ट जद के कुछ ज़िलां मांय बिरखा रो येलो अलर्ट जारी करी ज्यो है। ईं बीचे, शुक्रवार ने लगातार बारिश व्हेवण ऊं केई ठोडां पाणी भर ग्यो अर जिन्दगी माथे असर पड़्यो। बारां, कोटा, बाड़मेर, बालोतरा, जैसलमेर, धौलपुर, पाली अर करौली ज़िलां मांय तेज़ बारिश व्ही। प्रशासन री ओर ऊं लोगां ने नदियां रा बहाव हलका ऊं दूर रेहवण री अपील करीजी है। राजसमंद मांय ई मूसलाधार पाणी बरस्यो। म्हाणा खबरनवीस बतायो के भारी बारिश ऊं कुंभलगढ़ मांय हालात बिगड़ ग्या है। लारला 24 घंटां मांय सब ऊं बत्ती करीब 16 सेंटीमीटर बारिश कोटा ज़िला रा सांगोद मांय व्ही। बारां, अजमेर, झालावाड़, बूंदी, करौली, सवाईमाधोपुर, हनुमानगढ अर नागौर मांय ई ज़ोरदार मेह बरस्यो। चौमासा री चोखी बिरखा ऊं प्रदेश रा कूड़ा-बावड़ियां अर तळावां मांय ऊं करीब 64 फीसदी भर ग्या है। ईं सागे ई छोटा-मोटा 693 बंधां मांय ऊं 115 लबालब भर ग्या है जदके 404 थोड़ा-घणा भर्या है।