मौसम विभाग प्रदेश मांय आवता तीन-चार दिन मांय कठे-कठे तेज़ गर्मी व्हेवण अर लू बाजण सारू चेतायो है। महकमा रे मुजब इण रो असर आठ अप्रैल तांई रेहवण रा आसार है। ईं दौरान राज्य रा आतूणी हलकां मांय पारो 44 डिग्री सेल्सियस तांई पूगण री संभावना है। ईं बीचे, लारला 24 घंटां मांय बाड़मेर मांय पारो 42 दशमलव 7 डिग्री सेल्सियस तांई पूग ग्यो। जालौर, जोधपुर, चित्तौड़गढ़, कोटा अर टोंक मांय ई अधिकतम तापमान 40 डिग्री सेल्सियस ने पार कर ग्यो। राज्य री पाकिस्तान ऊं लाग्योड़ी सरहद कने एंटी साइक्लोन बणबा रे कारण गर्मी और तेज व्हे सके है। मौसम केन्द्र जयपुर रा निदेशक राधेश्याम शर्मा बतायो के प्रदेश रा तापमान मांय तीन ऊं चार डिग्री सेल्सियस तांई री बधोतरी री संभावना है।