सितंबर म्हीने रो पेलो सप्ताह बीत जावण रे पाछे भी प्रदेश मांय मॉनसून आपरी पूरी रंगत मांय है। लारला 24 घंटां रे चालता राज्य मांय कुछेक ठोड़ां मांय भारी बिरखा रे कारणे जनजीवन माथे घणो असर पड्यो है। मौसम महकमे रे मुजब अलवर, भरतपुर, करौली, सिरोही, झालावाड़, बूंदी अर टोंक जिलां मांय कठे-कठे भारी बिरखा दरज करीजी है। इण रे चालता पूर्वी राजस्थान मांय सब सूं बत्ती बिरखा अलवर ज़िले रा कठूमर मांय 11 सेंटीमीटर दरज हुई। इणी तरह पश्चिमी राजस्थान रा सोजत मांय चार सेन्टीमीटर बारिश दरज हुई। महकमो अजमेर, जोधपुर, भीलवाड़ा, नागौर, पाली, चित्तोडगढ़ अर दक्षिणी ज़िलां मांय कुछेक ठोड़ां माथे मध्यम सूं तेज़ बिरखा अर कठे-कठे भारी बारिश होणे री चेतावनी दी है। इणी तरह जयपुर, अलवर अर पूर्वी ज़िलां रे साथे-साथे शेखावाटी खेतर रा जिलां अर उदयपुर संभाग रा कुछेक जगावां मांय हल्की सूं मध्यम बिरखा होवण री आस है। इण बीच राजधानी जयपुर मांय दो दिन सूं चाल रियो बरसात रो दौर आज भी बण्योड़ो है। इण दौरान ज़िलाभर मांय रूक-रूक कर बरसात हो री है। अजमेर मांय आज भी बिरखा होणे सूं आमजन घणो प्रभावित हुओ। वठी ने सुंवारे धूप खिलणे रे साथे दुपहरां पाछे ओजू बरसात रो सिलसिलो सरू हुआ। पडौसी जिले केकड़ी मांय भी जारी रिमझिम बरसात सूं नदी-नाळां मांय पाणी री आवक बध ग्यी है। म्हाणा खबरनवीसा बतायो कि जिला मांय लगोतार हो री भारी बरसात सूं डाई नदी उफाण माथे है, जिण सूं लसाडिया बांध री चादर तेज़ी सूं बह री है। वठी ने पाली मांय भी लगोतार बिरखा सूं केई नदी नाळा उफाण माथे आ ग्या है। ज़िले रो समंद बांध दशकां पाछे ओवरफ्लो व्हे ग्यो। जिला प्रशासन सावचेती राखता व्ह्या लोगां सूं पाणी रा बहाव खेतर सूं दूर रहणे री अरज करी है। हाड़ौती मांय भी लारला कुछ दिनां सूं जारी बरसात सूं कोटा बैराज रो पाणी रो स्तर बध ग्यो है। आज बैराज रा दो गेट खोलर सात हजार क्यूसेक पाणी री निकासी करीजी। इण बार रेगिस्तानी ज़िलां मांय भी चोखी बिरखा रो सिलसिलो बण्योडो है। बालोतरा जिला मांय आज फेरू हुई मूसलाधार बरसात सूं निचले हलकां मांय पाणी भर ग्यो। वठी ने कल्याणपुर, पचपदरा, पाटोदी अर गिड़ मांय जमर मेह बरस्यो।