राज्य मांय बिरखा रा दौर चाल रह्यो है। लारला 24 घंटा रे दौरान केई ठौड़ां हलका ऊं मझला दर्जा री बिरखा दर्ज करी ज्यी। सब ऊं बत्ती बिरखा राजसमंद ज़िला रा नाथद्वारा मांय मांय 6 सेंटीमीटर दर्ज करी ज्यी। वठे ई धौलपुर रा राजाखेड़ा मांय 5, भीलवाड़ा रा सहाड़ा, करौली रा सपोटरा अर बूंदी रा नैनवा अर दौसा रा महुवा मांय 3-3 सेंटीमीटर पाणी बरस्सो। राजधानी जयपुर मांय आज दोपहरां पाछे मौसम बदल्यो अर हवा रे साथै तेज़ बिरखा व्ही। भरतपुर अर दौसा मांय दोपहर री बगत तेज बिरखा व्ही। आथूणी ज़िला मांय कुछ ठौड़ां हलकी बिरखा व्ही। मौसम केन्द्र जयपुर मुजब काले राज्य रा आगूणी हलका मांय कोटा, भरतपुर, अजमेर अर उदयपुर संभागां मांय अर आथूणी राजस्थान रा बीकानेर अर जोधपुर संभागां मांय बिरखा होवण री आस है। भरतपुर मांय गंभीरी नदी मांय डूब जावण ऊं एक मिनख री मौत व्हे ग्यी। जाणकारी मुजब तीन मिनख नाहवण सारू गया हा जिण मांय ऊं एक री डूब जावण ऊं मौत व्हे ग्यी।