प्रदेश मांय भारी बिरखा रो दौर थमबां रे पछे अबे हालात सुधरबा लाग्या है। आज बत्ती ठौड़ां माथे धूप खिली री अर मौसम सुहावणो रह्यो। पश्चिमी ज़िला मांय कुछेक ठौड़ां माथे काल रात हल्को मेह बरस्यो। लारला 24 घंटा मांय पश्चिमी राजस्थान रा सम मांय सब ऊं बत्ती 8 सेंटीमीटर बिरखा दर्ज करी गयी। अठिने जैसलमेर रा चांधन मांय बत्तो पाणी पड़बा सुं टुट्या मकानां री पिछाण करी गयी। म्हाका खबरनवीस रे मुजब जिला प्रशासन निचला इलाकां सुं पाणी निकाळबा मांय जुट्यो है। हनुमानगढ़ ज़िला रा जान्या-मान्या भद्रकाली मिदर रे कने घघ्घर नदी रो पाणी पुळ रे बराबर आ ग्यो। इण ने देखता थकां प्रशासन पुळ माथे आबा जाबा माथे रोक लगा दी। बीकानेर शहर मांय बारिश सुं जर्जर मकानां ने गिराबा खातर ज़िला प्रशासन मकान मालिकां ने नोटिस दियो है। नगर निगम शहर मांय इण भांत रा 90 मकानां री पिछाण करी है। वठिने बारां रा शाहाबाद हलका मांय तालाब री पाळ टूटबा सुं देवरी हलका रा केई गांवा पाणी मांय डूब ग्या। जिला प्रशासन गांवा वाळां ने भर्या पाणी री ठौड़ सुं दूर रहबा री सलाह दी है अर मौका माथे एनडीआरएफ री टीम तैनात करी गयी है। जयपुर ज़िला रा बस्सी हलका मांय हींगोनिया गौशाला रे कने ढूंढ नदी अर चाकसू हलका मांय पाणी मांय डूबर मर्या दो लोगां रा शवां ने एन.डी.आर.एफ. री टीम अर प्रशासन बारे काड लियो है।मौसम केन्द्र जयपुर रे मुजब कोटा, भरतपुर, अजमेर, उदयपुर, बीकानेर अर जोधपुर संभागां मांय काल कठे-कठे मेह बरस सके है।