प्रदेश रा ऊगणी जिलां मांय लारला चार दिन ऊं व्हे रही जोरदार बिरखा रो दौर आज मंदो पड ग्यो, जिण ऊं जनता ने साता मिली है। करौली मांय दोपहरां तांई व्ही बिरखा पाछे मौसम साफ व्हे ग्यो। जयपुर शहर रा कुछ हलकां मांय संवारे बारिश पाछे तावड़ो निकळ्यो। सवाईमाधोपुर मांय आज बरसात नी व्ही। धौलपुर मांय ई आज बिरखा नी व्हेवण ऊं साता मिली है। हालांकि सिरोही जिला रा माउंट आबू अर आबूरोड समेत केई ठोड़ा आज ई मेह बरस्यो। बिरखा रे कारण माउंट आबू मांय मौसम सुहावणो व्हे ग्यो है। चूरू मांय जोरदार बिरखा रा समाचार है। दौसा, करौली, जयपुर अर डीग जिलां मांय आज ई बिरखा व्ही। दौसा, करौली, भरतपुर, धौलपुर अर सवाईमाधोपुर जिलां रा केई गांव अर शहरां रा नीचला हलकां मांय हाल ई पाणी भर्योड़ो है। डीग मांय लगातार बारिश व्हे रही है अर बत्ती बिरखा रे कारण केई गांवां रो संपर्क जिला मुख्यालय ऊं टूट ग्यो है। दौसा जिला रा केई हलकां मांय आज ई तेज़ मेह बरस्यो। म्हाणा खबरनवीस बतायो के तेज बारिश पाछे नदी-नाळां मांय पाणी उफण रह्यो है। भारी बारिश ने ध्यान राखता थकां रेल प्रशासन ई सावचेती बरत रह्यो है। उत्तर पश्चिम रेलवे रा डिविजनल रेल मैनेजर विकास पुरवार आज रेलवे लेणां रो जायज़ो लीनो। ईं बीचे मौसम विभाग आवता चार-पांच दिन प्रदेश मांय तेज़ बारिश रा आसार जताया है। मौसम महकमो आज दौसा मांय घणी जोरदार बिरखा रो रेड अलर्ट जदके सवाईमाधोपुर, टोंक, सीकर, करौली, झुंझुनू, जयपुर , धौलपुर, बूंदी, भतरपुर अर अलवर मांय भारी बिरखा रो ऑरेंज अलर्ट जारी कीनो है।