प्रदेश रा न्यारा-न्यारा हलकां मांय एक-दो दिन रा विराम पाछे बिरखा रो दौर ओजू सरू व्हे ग्यो है। जोधपुर मांय एक सप्ताह पाछे आज चोखो मेह बरस्यो। करौली मांय जिला मुख्यालय अर आरे-सारे रा हलकां मांय व्ह्या मेह पाछे पांचना बंधा रा दो दरूजा खोल र बत्तो पाणी निकाळ्यो जा रह्यो है। गंभीर नदी मांय पाणी रा तेज़ बहाव ने ध्यान राखता थकां प्रशासन जनता ऊं सावचेत रहवण री अपील कीनी है। डूंगरपुर ज़िला मांय रूक-रूक व्हे रही बिरखा रे कारण मेवाड़ा बांध माथे ई चादर चाल रही है। मौसम विभाग रे मुजब आज कोटा अर उदयपुर संभाग मांय कठे-कठे भारी जद के जयपुर, जोधपुर अर अजमेर संभाग रा कुछ हलकां मांय बादळां री गाज़ सागे बिरखा रा आसार है। महकमा रे मुजब राज्य रा ऊगणी हलका मांय केई ठौड़ां काल ऊं बिरखा मांय बधोतरी व्हेवण री संभावना है।