राज्य मांय लारला 24 घंटां मांय कठे-कठे हल्की सूं तेज बारिश व्ही। मौसम केन्द्र जयपुर रे मुजब सब ऊं बत्ती 13 सेंटीमीटर बारिश अलवर रा बानसूर मांय व्ही। चूरू रा राजगढ़ मांय 10, बहरोड़ मांय 9, मंडावर, खैरथल, बहादुरपुर अर भरतपुर रा भुसावर मांय 8-8 सेंटीमीटर मेह बरस्यो। इण बीच, राजधानी जयपुर मांय आज कुछेक ठोडां माथे तेज तो कठे-कठे बूंदाबांदी रा समाचार है। नीमका थाना मांय दोपहर तेज मेह बरस्यो, जिणसूं आमजन ने राहत मिली। अठीने दौसा मांय भी मूसलाधार मेह बरस्यो, जिणसूं शहर रा निचला इलाकां मांय पाणी भर्ग्यो। मौसम केन्द्र रे मुजब काल कोटा, भरतपुर, अजमेर, उदयपुर, बीकानेर अर जोधपुर संभागां मांय कठे-कठे हलका सूं मझलो मेह बरस सके है।