जयपुर, सीकर अर कोटा समेत राज्य रा 10 जिलां मांय आज संवारे ऊं ई रुक-रुक र मेह बरस रह्यो है। राजधानी जयपुर रा न्यारा-न्यारा हलकां मांय संवारे सरू व्ह्यो हल्की बारिस रो दौर सिंज्या तांई चालतो रह्यो। जयपुर कने चौमूं मांय 2 घंटा तांई व्ही जोरदार बिरखा पाछे मालेश्वर धाम री डूंगरियां ऊं झरनो बहवण लाग्यो। सीकर जिला रा श्रीमाधोपुर मांय लारला 6 दिन ऊं लगातार मेह बरस रह्यो है। तेज बारिश रे कारण शहर रा जूना बस स्टैंड कने दुकानां मांय पाणी घुस ग्यो। करौली ज़िला रा हिंडौन मांय व्ही मूसलाधार बिरखा ऊं केई हलकां मांय पाणी भर ग्यो। टोंक ज़िला रा शहरी अर गांवांई हलकां मांय ई चोखी बिरखा व्ही। कोटा मांय व्हे रही बिरखा रे कारण संभाग रा घणखर बंधा भर ग्या है। डीग ज़िला मांय ई चोखो मेह बरस रह्यो है। डीग मांय बिरखा रे कारण एक मकान ढस जावण ऊं एक ही पिरवार री दो जणियां री मौत व्हे ग्यी। नीम का थाना ज़िला मांय ई जोहड़ मांय भर्या पाणी मांय डूब जावण ऊं एक जणा री मौत व्हे ग्यी। मौसम केंद्र जयपुर रे मुजब आज जयपुर, अजमेर अर कोटा संभाग मांय कठे-कठे घणी ज़ोरदार बारिश व्हेवण रा आसार है। जयपुर, अजमेर, कोटा, उदयपुर अर भरतपुर संभाग मांय आवता पांच-सात दिन तांई चोखो मेह चालतो रेहवण रा आसार है। बीकानेर अर जोधपुर संभाग रा कुछ हलकां मांय आवता 5-6 दिन तांई बारिश व्हेवण री संभावना है। शेखावाटी हलका मांय ई कठे-कठे ज़ोरदार बिरखा रा आसार है।