मौनी अमावस्या रे पर्व माथे दीतवार ने प्रदेश री न्यारी-न्यारी जगावा माथे धार्मिक आयोजन होया। मन्दिरां अर तीर्थ स्थलां माथे आज सुंवारे सूं ही श्रिद्धालुआं रो तातो लाग्यो रह्यो। लोगां पवित्र सरोवरों मांय स्नान कर दान पुण्य कर्यो। राज्यपाल हरिभाऊ बागडे़ आज पुष्कर पहुंच्या। वठिने वणा सांई मंदिर गर्भगृह मांय पूजा कर र मंदिर रो शुभारम्भ कर्यो। इण मौके माथे केन्द्रीय कृषि मंत्री भागीरथ चौधरी भी पूजा मांय भेळा व्ह्या। सवाईमाधोपुर ज़िलां रा रामेश्वर घाट थापित त्रिवेणी संगम माथे भी घणी तादाद मांय श्रिद्धालुआं स्नान कर्यो। पाली मांय मिन्दरां मांय न्यारा-न्यारा अनुष्ठान कर्या गया। सोमनाथ मिन्दर मांय भगवान शिव री खास पूजा-आराधना करीजी। भरतपुर मांय भी मौनी अमावस्या ने श्रिद्धालुआं मौन रख र उपवास कर्यो। वठिने पाली मांय गायां रो श्रिंगार कर पूजन कर्यो गयो अर गुड-चारो खिलायो गयो।