मुम्बई मांय चाल रह्या वैश्विक सम्मेलण – वेव्स रे दौरान शुक्रवार ने व्ही वैश्विक मीडिया वार्ता मांय वेव्स घोषणा ने अपनायी ज्यी। इण मांय सदस्य देश रीति-रिवाज़ अर विरासत ने आगे बधावण रा काम मांय मदद करण बाबत् एक राय जतायी। वेव्स शिखर सम्मेलन रा तैत राख्यी ज्यी मीडिया वार्ता मांय 77 देशां रा नुमाइन्दा सिरकत कीनी। विदेश मंत्री सुब्रह्मण्यम जयशंकर अर सूचना अर प्रसारण मंत्री अश्विनी वैष्णव री सदारत मांय राख्यी ज्यी मीडिया वार्ता मांय सगळा देश गलत अर भरमावण वाळी जाणकारियां ने जनता बीचे पूगावण ऊं रोकण अर मीडिया री अखंडता, तथ्य-आधारित पत्रकारिता अर ज़िम्मेदार विज्ञापन ने बधावो देवण माथे ई सहमति जतायी ज्यी। मीडिया अर मनोरंजन रा हलका मांय दुनिया मांय भारत री पिछाण बणावण रा मकसद ऊं चाल रह्या वेव्स सम्मेलन मांय शुक्रवार ने केई सत्र राख्यी ज्या। विदेश मंत्री एस जयशंकर वैश्विक मीडिया संवाद रो उद्घाटन कीनो। ईं मौके वे कह्यो के प्रौद्योगिकी अर परम्परा ने सागे मिल र चालणो चाहिजे। वे कह्यो के प्रौद्योगिकी देश री अनमोल विरासत ने बुलंदियां तांई पूगावण अर जाग जगावण री कुंजी है। ईं मौके सूचना अर प्रसारण मंत्री अश्विनी वैष्णव कह्यो के मीडिया अर मनोरंजन जगत रो बाज़ार तीस खरब अमेरिकी डॉलर रो है। वे कह्यो के रचनात्मकता सरहदां रे पार ई लोगां ने जोड़े है। सम्मेलन मांय थावर ने मीडिया अर मनोरंजन रा हलका रा साल 2024-25 रा आंकड़ां रा बारा मांय हैंडबुक जारी करी जावेला।