मुख्यमंत्री भजनलाल शर्मा कह्यो है के चिकित्सा अर स्वास्थ्य इंसानियत री सेवा ऊं जुड्यो मुद्दो है अर ईं माथे आवता बजट मांय खास ध्यान दियो जावेला। वे शुक्रवार ने जयपुर मांय चिकित्सा अर स्वास्थ्य हलकां रा जाणकारां सागे बजट ऊं पैली री मीटिंग मांय बोल रह्या हा। मुख्यमंत्री आवता बगत मांय स्वास्थ्य ऊं जुड़्या सुबीतां सारू साधनां री कमी नी आवण देवण रो भरोसो दिरायो है। वे कह्यो के राज्य सरकार लारला दो साल मांय प्रदेश रा स्वास्थ्य ढांचा ने मज़बूत बणायो है, जिण ऊं गांवां अर ढांणियां तांई जनता ने चोखो ईलाज मिल रह्यो है। मुख्यमंत्री कह्यो के आखा देश सारू मिसाल बणी प्रदेश री ’आयुष्मान आरोग्य योजना’ रा तैत 37 लाख मरीज़ां ने सात हजार करोड़ रुप्या ऊं बत्ता खर्च रो ईलाज मुफ्त दियो ज्यो।
श्री शर्मा कह्यो के प्रदेश मांय 7 नुवा मेडिकल कॉलेज खोली ज्या है अर 15 मेडिकल कॉलेजां रो काम चाल रह्यो है। मुख्यमंत्री कह्यो के बजट ऊं पैली री बातचीत ऊं स्वास्थ्य हलका रा जाणकारां ऊं मिल्या सुझावां ने शामिल कर र जनता ने स्वास्थ्य रा बेहतर सुबीता मुहैया कराया जावेला। मीटिंग मांय उपमुख्यमंत्री डॉ. प्रेमचंद बैरवा, चिकित्सा अर स्वास्थ्य मंत्री गजेन्द्र सिंह खींवसर अर मुख्य सचिव वी. श्रीनिवास ई शामिल व्ह्या।