मुख्यमंत्री भजन लाल शर्मा राजस्थान ने सूचना प्रौद्योगिकी हलका मांय अगाड़ी बणावण री अरज करी है। वणा ईं सारू निवेशकां ने हर चाहीजती मदद अर सुविधा सारू भरोसो दियो है। श्री शर्मा दीतवार ने मुख्यमंत्री रहवास माथे राजस्थान डिजिफेस्ट टाई ग्लोबल समिट-2026 मांय न्यूतिज्या देश रा नामी आई.टी. इंटर प्रन्योर ऊँ मिल्या। ई दौरान मुख्यमंत्री कह्यो के राजस्थान ने आईटी हब बणावण सारू ग्लोबल कैपेबिलिटी सेन्टर पॉलिसी, डेटा पॉलिसी अर एआईएमएल पॉलिसी लाई ज्यी है। मुख्यमंत्री अहलकारां ने निवेशकां रे साथे बरोबर संपर्क राखण अर वां रा सुझावा अर जरूरता माथे तुरत काम करण रा निर्देश दिया। डिजिफेस्ट रा उद्घाटन सत्र मांय सूचना अर प्रौद्योगिकी मंत्री राज्यवर्द्धन सिंह राठौड शिरकत करी। ईं मौके वणा कह्यो के ओ सम्मेलन अन्तर्राष्ट्रीय थर माथे डिजिटल हलका मांय व्हे रह्या नुवा बदलाव ऊँ जाणकारी करावण रे साथै ई स्टार्टअप अर नौजवानां ने सिखावण रो मौके देवे है। ध्यानजोग है के जयपुर रा जेईसीसी मांय तीन दिन रो राजस्थान डिजिफेस्ट टाई ग्लोबल समिट-2026 आयोजित कर्यो जावे जिण मांय दस हजार ऊँ बत्ती प्रतिभागी, 500 ऊँ बत्ती निवेशक अर कोई 300 प्रदर्शक भेळा व्हे रह्या है।