मुख्यमंत्री भजन लाल शर्मा कह्यो है के राज्य सरकार महिलावां री हिफाजत, कल्याण अर वां ने आगे बधावण सारू लगातार काम कर रही है। श्री शर्मा आज झालावाड़ ज़िला रा डग मांय राख्यी ज्या महिला सशक्तिकरण सम्मेलन मांय बोल रह्या हा। वे कह्यो के राज्य सरकार लारला दो साल मांय महिलावां ने आगे बधावण सागे केई खास जतन कीना।
सम्मेलन मांय पैली वाळी मुख्यमंत्री वसुन्धरा राजे समेत भाजपा रा आला नेता अर कार्यकर्ता शामिल व्ह्या। मुख्यमंत्री ईं दौरान न्यारी-न्यारी परियोजनावां रो उद्घाटन कीनो अर नुवा कामां री सरुआत कीनी। मुख्यमंत्री गोवर्धन बायोगैस प्लांट अर सीता वाटिका रो ई दौरो कीनो। मुख्यमंत्री डग रा पशुधन अनुसंधान केंद्र मांय देशी गौवंश ने बचावण सारु “सेंटर ऑफ एक्सीलेंस” बणावण रो ऐलाण कीनो। वे कह्यो के ईं सेन्टर मांय गौवंश री मालवी अर गिर नस्लां ने बचावण, बेहतर बणावण अर सुधार ऊं जुड़्या काम कर्या जावेला। ईं सागे ई ईं केंद्र मांय डेयरी, प्रजनन अर कृत्रिम गर्भाधान समेत न्यारा-न्यारा सुबीता मुहैया कराया जावेला। ईं बीचे राज्य सरकार कानी ऊं जनता रा भला सारु चलायी जा रही योजनावां री जाणकारी विकास रथां रे ज़रिए जनता तांई पूगायी जा रही है। भरतपुर ज़िला रा 15 गांवां मांय विकास रथां रे मार्फत न्हानी फ़िल्मां बता र आं री जाणकारी दी जा रही है।
बाड़मेर रा कारटियां अर गंगासरा मांय विकास रथां रे मार्फत सरकार री जनकल्याणकारी योजनावां री जानकारी दीरीजी। जैसलमेर ज़िला रा पोकरण मांय विकास रथां रे जरिये ओडियो-वीडियो बता र विकास अर नवाचारां री जाणकारी दी जा रही है। राज्य री मौजूदा सरकार रा कामकाज रा दो साल पूरा व्हेवण रा सिलसिला मांय मंगलवार ने नागौर रा ज़िला रा मेड़ता सिटी कने डांगावास मांय राज्य स्तर रो किसान सम्मेलन राख्यो जावेला। ईं सम्मेलन मांय केन्द्रीय कृषि मंत्री शिवराज सिंह चौहान अर मुख्यमंत्री श्री शर्मा ई शामिल व्हेला।