मुख्यमंत्री भजन लाल शर्मा कयो के न्यायपालिका लोकतंत्र रो वो मजबूत स्तम्भ है, जको समाज मांय न्याय अर समानता री अलख जगावे है। सशक्त न्याय व्यवस्था सूं ही नागरिकां मांय सुरक्षा रो भाव आवे है। श्री शर्मा दीतवार ने मुख्यमंत्री निवास माथे वीडियो कॉन्फ्रेन्सिंग रे माध्यम सूं जोधपुर मांय राखी ज्या बार काउंसिल ऑफ राजस्थान रा नुवा बण्योडा भवन रे उद्घाटन जळसे मांय बोल रिया हा। वणां कयो के प्रदेश मांय तीन नुवा आपराधिक कानूनां ने लागू कर्यो है, जिण सूं न्याय प्रक्रिया मांय तेजी आई है। इण जळसा मांय उच्चतम न्यायालय रा न्यायामूर्ति संदीप मेहता, न्यायमूर्ति विजय बिश्नोई अर राजस्थान उच्च न्यायालय रा कार्यवाहक मुख्य न्यायाधीश संजीव प्रकाश शर्मा समेत केई न्यायाधीश अर अधिवक्ता मौजूद रिया।