मुख्यमंत्री भजन लाल शर्मा काश्तकारां रा मान ने सब ऊँ मोटो मान बतायो है। वे थावर ने भरतपुर मांय राख्यी ज्या किसान सम्मेलन मांय बोल रह्या हा। श्री शर्मा कह्यो के किसान रे विकसित व्हेवण ऊँ देश अर प्रदेश आप ऊँ आप विकसित बण जावेला। मुख्यमंत्री प्रदेश रा करीब 72 लाख किसानां रा खाता मांय मुख्यमंत्री किसान सम्मान निधि री चौथी किश्त रा तौर ऊँ 718 करोड रूप्या ऊँ बत्ती रकम किसानां रा खातां मांय डीबीटी रे जरिये भेज्यी। मुख्यमंत्री कह्यो के सरकार किसानां ने मज़बूत बणावण सारू काम कर रही है। मुख्यमंत्री कह्यो के केन्द्र कानी ऊँ किसानां सारू चलायी ज्यी धन-धान्य योजना ऊँ प्रदेश रा आठ ज़िला ई जोड़ी ज्या है। वे कह्यो के किसानां री उपज बधावण सागे उपज रो मोल बधावण सारू सरकार छोटी-छोटी साखां ने ई उचित मोल दिरावण रो काम कर रही है। मुख्यमंत्री कह्यो के सरकार गोपालक क्रेडिट कार्ड योजना ऊँ किसान क्रेडिट कार्ड ने जोड़्या है। मुख्यमंत्री इण ऊँ पैली नदबई मांय 55 करोड रुप्या रा खर्च ऊँ बणाया जावण वाळा जिला अस्पताल रा काम री नींव ई रखी। ईं मौके सहकारिता मंत्री गौतम कुमार दक, जल संसाधन मंत्री सुरेश रावत अर गृह राज्य मंत्री जवाहर सिंह बेढ़म समेत केई विधायक मौजूद रह्या। श्री शर्मा वां रा गांव अटारी मांय राख्यी ज्या कार्यक्रमां मांय ई शामिल व्ह्या। प्रदेश रा सगळा ज़िला ई मुख्यमंत्री रा कार्यक्रम ऊँ वर्चुअली तरीका ऊँ जुड़्या। पाली मांय राख्यी ज्या कार्यक्रम मांय पशुपालन मंत्री जोगाराम कुमावत कह्यो के सरकार किसानां अर गरीबां रो भलो करणो तैय कीनो है। सवाईमाधोपुर मांय व्ह्या कार्यक्रम रे दौरान राज्य स्तर रा कार्यक्रम रो सीधो प्रसारण ब्लॉक अर ग्राम पंचायत लेवल माथे ई करी ज्यो जिण मांय मोटी तादाद मांय किसान अर जनता भाग लीनो। बाड़मेर मांय राख्यी ज्या जिला स्तर रा कार्यक्रम मांय मुख्यमंत्री ईं रो फायदो लेवण वाळा किसानां सागे बातचीत ई कीनी। डीग ज़िला रा किसानां रा खातां मांय 10 करोड़ 39 लाख रूप्या ऊँ बत्ती रकम भेजी ज्यी।