मुख्यमंत्री भजन लाल शर्मा आवता बगत री जरूरतां ने ध्यान राखता थकां कार्य योजना बणावण माथे ज़ोर दीनो है। श्री शर्मा सोमवार ने जयपुर मांय राख्यी ज्या राज्य स्तर रा सम्पूर्णता अभियान सम्मान समारोह मांय बोल रह्या हा। वे कह्यो के सगळां ने सागे ले र विकास करण सारू सोच सागे योजना बणा र काम करणो जरूरी है। श्री शर्मा योजनावां ने बेहतर तरीका ऊं लागू करण सारू न्यारा-न्यारा महकमां रा तालमेल माथे ई ज़ोर दीनो। मुख्यमंत्री कह्यो के प्रदेश रा समावेशी विकास सारू विकसित राजस्थान 2047 विज़न डॉक्यूमेंट बणायो जा रह्यो है। इण मांय आवता बगत री जरूरतां रा अंदाज रे मुताबिक लम्बी मियाद री योजनावां शामिल करी जा रही है। श्री शर्मा कह्यो के गुरू गोलवलकर आकांक्षी ब्लॉक विकास योजना रा तैत नुवा कामां ने बधावो दे र अन्त्योदय रो संकल्प पूरो कर्यो जा रह्यो है। नीति आयोग री ओर ऊं तैय करी ज्या 6 संकेतकां मांय बेहतर काम रा आधार ऊं करौली ज़िलो प्रदेश मांय अव्वल रह्यो। कार्यक्रम मांय न्यारा-न्यारा संकेतकां मांय सौ फीसदी उपलब्धि हासिल करण वाळा ब्लॉकां रो ई मान करी ज्यो। मुख्यमंत्री सोमवार ने वां रा रहवास माथे जन-सुणवाई कीनी। ईं दौरान वे अहलकारां ने जनता रा समस्यावां माथे खास ध्यान देता थकां टेमसर निपटारा रा हुकम दीना।