मुख्यमंत्री श्री भजनलाल शर्मा कह्यो है के वां रा राज मांय कानून व्यवस्था बणायी राखण माथे खास ध्यान दियो ज्यो है अर कानून व्यवस्था ने मजबूत बणावण सारू पुलिस तंत्र ने और मजबूत कर्यो जावेला। वे आज जयपुर मांय सरू व्ह्या पुलिस रा राज्य स्तर रा अहलकारां रा दो दिन रा सम्मेलन रा उद्घाटन सत्र मांय बोल रह्या हा। मुख्यमंत्री कह्यो के साइबर अपराधां ऊं मिल र अपराध करण तांई री भांत-भांत री चुनौतियां रो सामो करता थकां पुलिस ने और मजबूत बण र काम करणो व्हेला। वे पुलिस विभाग ऊं साइबर अपराधां ने खत्म करण अर नौजवानां मांय नशा री लत री रोकथाम बाबत् काम करण माथे जोर दीनो। मुख्यमंत्री भ्रष्टाचार भष्टाचार ने बिल्कुल बर्दाश्त नी करण री नीति अपनावण बाबत् कह्यो। कार्यक्रम मांय गृह राज्य मंत्री जवाहर सिंह बेढ़म कह्यो के राज्य ने अपराध मुक्त बणावण सारू पुलिस लगातार काम कर रही है। ईं मौके मुख्य सचिव सुधांश पंत कह्यो के अपराधां माथे काबू करण रा बारा मांय प्रदेश मांय कर्या जा रह्या काम ऊं देश मांय राजस्थान री बेहतर छवि बणी है। दो दिन रा ईं सम्मेलन मांय ‘पुलिसिंग विद एक्सीलेंस- द वे फॉरवर्ड’ मुद्दा माथे नुवा आपराधिक कानून, आर्टिफिशियल इन्टेलीजेंस टूल्स, डीप फेक, साइबर सिक्योरिटी अर नशीली चीजां री तस्करी री रोकथाम सरीखा मुद्दा माथे न्यारा-न्यारा सत्र राख्या जावेला।