मुख्यमंत्री भजन लाल शर्मा चौमासा मांय लोगां ऊं पाणी भेळो करण बाबत् खास ध्यान देवण बाबत् कह्यो है। वे बुधवार ने राजसमंद रा भिक्षु निलयम परिसर मांय वंदे गंगा जल संरक्षण जन अभियान रा तैत राख्यी ज्या जळसा मांय बोल रह्या हा। मुख्यमंत्री कह्यो के सब जणां रे मिल र पाणी बचावण ऊं प्रदेश मांय ज़मीं हेटे पाणी रो लेवल ऊंचो आवेला। वे पाणी बचावण सागे हरियाळो राजस्थान अभियान मांय ई प्रदेश री जनता ऊं योगदान देवण बाबत् कह्यो। श्री शर्मा राजसमंद झील कने पौधा ई रोप्या। ईं पाछे मुख्यमंत्री जालौर ज़िला रा सांचौर मांय नमर्देश्वर घाट माथे राख्यी ज्यां कार्यक्रम मांय ओजू कह्यो के पाणी बचावण माथे सरकार रो खास ध्यान है। अभियान रा तैत प्रदेशभर मांय पाणी बचावण सारू जाग जागावण रा कार्यक्रम राख्या जा रह्या है। ईं सागे ई कूड़ा-बावड़ियां री साफ़-सफ़ाई अर मरम्मत रा काम ई कर्या जा रह्या है। सलूम्बर मांय सोनार माता मिंदर परिसर मांय श्रमदान रो कार्यक्रम राख्यी ज्यो, जिण मांय ज़िला कलेक्टर समेत मोकळा लोग 200 किलोग्राम ऊं बत्तो कचरो हटायी ज्यो। भीलवाड़ा मांय पशुपालन मंत्री जोराराम कुमावत जल पूजन कर र पौधा रोप्या। झुन्झुनू रा बीड़ हलका री लवकुश वाटिका मांय पौधा रोपी ज्या।