राज्य री मौजूदा सरकार रा कामकाज रा दो साल पूरा व्हेवण रा सिलसिला मांय राख्या जा रह्या आयोजनां रा तैत बुधवार ने सीकर ज़िला रा रामगढ़ शेखावाटी मांय खास कार्यक्रम राख्यी ज्यो। इण मांय मुख्यमंत्री भजनलाल शर्मा सीकर अर झुंझुनूं ज़िलां ने 539 करोड़ रुप्या रा खर्च ऊं करायी ज्या विकास रा कामां री सौगात दीनी। कार्यक्रम मांय नगरीय विकास अर आवासन मंत्री झाबर सिंह खर्रा अर जनता रा दूजा नुमाइन्दा ई शामिल व्ह्या। ईं मौके राख्यी ज्यी जनसभा मांय मुख्यमंत्री कह्यो के सुशासन सारू जनता रा प्रति जवाबदेही ज़रूरी है। वे कह्यो के राज्य सरकार पूरी जवाबदेही ऊं काम कर रही है अर दो साल रा कामकाज रो हिसाब लोगां बीचे जा र दियो जा रह्यो है। इण ऊं पैली मुख्यमंत्री बुधवार ने राजस्थान फिल्म पर्यटन प्रोत्साहन नीति-2025 जारी कीनी। इण ने राजस्थान ने देशी अर परदेसी सिनेमा री शूटिंग री पसंदीदा ठौड़ बणावण री दिशा मांय खास कदम मान्यो जा रह्यो है। ईं मौके श्री शर्मा कह्यो के आ नीति राज्य ने फिल्मां री खास ठौड़ रा तौर ऊं सामी लावेला, जिण ऊं नौजवानां ने नौकरी-धंधा अर कौशल विकास रा मौका मिलेला। मुख्यमंत्री कह्यो के नुवी नीति मांय फिल्मां बणावण वाळां ने सब्सिडी अर बधावो देवण सागे काम-धंधो करणो आसान बणावण बाबत् ई केई प्रावधान करी ज्या है। उपमुख्यमंत्री दीया कुमारी बतायो के राज्य मांय ज्यां फीचर फिल्मां, वेब सीरीज, टी.वी. सीरियल अर डॉक्यूमेंट्री री शूटिंग करी जावेला, वां माथे खर्च रा 30 फीसदी तांई छूट दी जावेला।