मुख्यमंत्री भजनलाल शर्मा कह्यो है के लुगाइयां प्रदेश री आधी आबादी है, ज्यां ने मज़बूत बणाया बगैर पूरा विकास रो सपनो सांचो नी व्हे सके है। वे राज्य री मौजूदा सरकार रा दो साल रा कामकाज रा सिलसिला मांय शुक्रवार ने धौलपुर ज़िला रा पचगांव मांय राख्यी ज्या राज्य स्तर रा महिला सम्मेलन मांय बोल रह्या हा। मुख्यमंत्री कह्यो के महिलावां ने मज़बूत अर अगाड़ी बणावण री सोच सागे सरकार प्रदेश मांय महिलावां रा विकास सारु काम कर रही है। मुख्यमंत्री सम्मेलन मांय सामाजिक न्याय अर अधिकारिता विभाग, उच्च शिक्षा अर स्कूल शिक्षा विभाग री योजनावां रो फायदो लेवण वाळां रा खातां मांय रकम भेजी। वे लखपति दीदी योजना रा तैत महिलावां ने कर्ज़ अर टेबलेट दिया ज्या। श्री शर्मा मुख्यमंत्री आयुष्मान आरोग्य योजना रा तैत आउटबाउंड पोर्टेबिलिटी री सरुआत ई कीनी। इण ऊं पैली वे स्कूली टाबरियां ने साइकिलां अर दिव्यांगजन ने स्कूटी दीनी। मुख्यमंत्री धौलपुर रा पंच गौरव, वन विभाग अर स्वयं सहायता समूहां री महिलावां कानी ऊं बणायी ज्या सामान री प्रदर्शनी ई देखी। ईं मौके उपमुख्यमंत्री दिया कुमारी, गृह राज्य मंत्री जवाहर सिंह बेढम अर जनता रा केई नुमाइंदां समेत मोटी तादाद मांय महिलावां मौजूद रही। न्यारा-न्यारा ज़िलां मांय ई महिला सम्मेलन राख्यी ज्या। पाली मांय राख्यी ज्या सम्मेलन मांय आयी महिलावां लारला दो साल मांय वां ने मिल्या फायदां री जाणकारी दीनी। देसूरी री रहवासी संतोष राजीविका अर दूजी योजनावां रो फायदो देवण सारु सरकार रो आभार जतायो।