मुख्यमंत्री भजनलाल शर्मा कह्यो है के वां री सरकार रो 2 साल रो कामकाज सुशासन अर विकास ने समर्पित रह्यो है। वे सोमवार ने जयपुर रा आर यू एच एस अस्पताल मांय राख्यी ज्या स्वास्थ्य शिविरां रा राज्य स्तर रा उद्घाटन जळसा मांय बोल रह्या हा। श्री शर्मा कह्यो के वां री सरकार लारला दो साल मांय हर तबका सारू काम कीनो है अर खुशहाल प्रदेश बणावण बाबत् केई जतन कीना है। वे कह्यो के सरकार नौजवानां, महिलावां, किसानां अर मजदूरां माथे खास ध्यान दे रही है। श्री शर्मा कह्यो के लगभग हर मोर्चा माथे वां रा राज रा 2 साल मांय ही लारली सरकार रा 5 साल री तुलना मांय बत्तो काम व्ह्यो है। मुख्यमंत्री ईं मुद्दा माथे विपख ने विधानसभा मांय अर बाहर खुली चर्चा री चुनौती दीनी।
मुख्यमंत्री कह्यो के प्रदेश मांय स्वास्थ्य सुबीतां ने बेहतर बणावण अर स्वास्थ्य रो बुनियारी ढांचो विकसित करण सारू लगातार जतन कर्या जा रह्या है। श्री शर्मा कह्यो के सरकार राज्य मांय स्वास्थ्य सुबीतां ने वां लेवल तांई ले जावणो तैय कीनो है, जठे परदेशी लोग ई ईलाज सारू राज्य मांय आवण लागेला।
ईं मौके मुख्यमंत्री केई कार्यक्रमां अर योजनावां री सरूआत कीनी। प्रदेश री मौजूदा सरकार रो दो साल रो कार्यकाल पूरो व्हेवण रे मौके ज़िलां मांय आरोग्य शिविर लगायी ज्या। पाली, सवाईमाधोपुर अर डूंगरपुर समेत न्यारा-न्यारा ज़िलां रा ज़िला अर उपजिला अस्पतालां अर न्यारा-न्यारा स्वास्थ्य केंद्रां माथे ईलाज रा खास शिविर लगायी ज्या। आं शिविरां मांय 30 साल ऊं बत्ती उम्र रा लोगां री बी.पी., शुगर, बी.एम.आई. अर कॉमन कैंसर री मुफ्त जाँच करी ज्यी। टी.बी. मुक्त भारत अभियान रा तैत टी.बी. रा लक्षणां री जाँच, आस वाळी लुगाइयां री जापा ऊं पैली री जाँचां करीजी अर बच्चां रे टीका लगायी ज्या। पाली, हनुमानगढ़, डूंगरपुर अर सीमलवाड़ा समेत केई ठौड़ां खूनदान शिविर ई लगायी ज्या। मुख्यमंत्री भजनलाल शर्मा ईं सोमवार ने केई कार्यक्रमां मांय शामिल व्ह्या। सोमवार ने मुख्यमंत्री रो जन्मदिन ई है। ईं मौके वे जयपुर री पिंजरापोल गौशाला मांय गायां री पूजा-अर्चना अर गौ सेवा कीनी।
मुख्यमंत्री सोमवार ने डीग ज़िला रा पूंछरी का लौठा रा श्रीनाथ जी मंदिर मांय दर्शन कर र पूजा-अर्चना कीनी। वे प्रदेश री लगातार बरकत, खुशहाली अर जनता री ज़िन्दगी मांय सुख-समृद्धि री कामना कीनी। मुख्यमंत्री मंदिर परिसर मांय मौजूद जातरुआं सागे ई मुलाकात कीनी। सोमवार ने सिंज्या श्री शर्मा जयपुर रा जवाहर कला केंद्र मांय राज्य स्तर री विकास प्रदर्शनी रो उद्घाटन कीनो। प्रदर्शनी मांय लारला दो साल मांय न्यारा-न्यारा महकमां री उपलब्धियां रो दरसाव करी ज्यो है। राज्य री मौजूदा सरकार री दूजी वर्षगांठ रे मौके आखा राज्य मांय नव उत्थान-नई पहचान, बढ़ता राजस्थान-हमारा राजस्थान, मुद्दा माथे कार्यक्रम राख्या जा रह्या है। प्रदेश मांय मंगलवार ने शहरी समस्या समाधान शिविर सरू कर्या जावेला। 24 दिसम्बर तांई लगाया जावण वाळा आं शिविरां मांय शहरी जनता री समस्यावां रा बेगा अर असरदार निपटारा री कोशिश करी जावेला। नगरीय विकास अर आवासन विभाग रा प्रमुख शासन सचिव देवाशीष पृष्टि बतायो के अ शिविर हर नगरीय निकाय अर प्राधिकरण मांय लगाया जावेला। वे बतायो के आं शिविरां मांय चाल रह्या मामलां सागे नुवा मामलां रो ई मौके ई निपटारो करण री कोशिश करी जावेला।