मुख्यमंत्री भजनलाल शर्मा कयो है के राजस्थान सैलाणी, निवेश अर औद्योगिक विकास रा मारग माथे तेजी ऊं आगे बध रियो है अर राज्य सरकार री निवेश मुजब नीतियां अर सिंगल विंडो क्लियरेंस सिस्टम ऊं सैलाणियां ऊं निवेश री प्रक्रिया सरल व्ही है। प्रवासी राजस्थानी दिवस रा बारा मांय आज जयपुर मांय व्ही सैलाणी महकमा री प्री-समिट मांय बोलता मुख्यमंत्री कयो के पर्यटन रा आधारभूत ढांचा ने और मजबूत बणावण सारू राज्य सरकार बेगा ई नुवी पर्यटन नीति लावेला। वणा कयो के इण रे तैत सैलाणी सुविधावां, मार्केटिंग अर प्रमोशन, मेळा अर तिवार, हुनर विकास, रूजगार अर निवेश रा काम पूरी प्रतिबद्धता रे साथे कर्या जाएला। ध्यानजोग है के प्रदेश मांय 10 दिसम्बर ऊं होवण वाळां प्रवासी राजस्थानी दिवस सम्मेलन ने ले र आं दिनां तैयारियां ज़ोरां माथे है। प्रवासी राजस्थानियां ने मायड भौम ऊं भावनात्मक जोड़ण सारू राख्यी ज्या ई आयोजन मांय देश-दुनिया ऊं राजस्थानी उद्योगपतियां, निवेशकां अर खास हस्तियां ने न्यौती ज्या है।