मुख्यमंत्री भजनलाल शर्मा कयो के प्रदेश रा नौजवानां ने न्यारा-न्यारा देशां मांय बोली जाबा वाळी भाषावां री जाणकारी खातर भाषाई स्कूल खोल्या जावेला। इण रे मार्फत मोट्यारा ने पर्यटन समेत न्यारा-न्यारा हलकां मांय रूजगार रा नुवा मौका मिल सकेला। श्री शर्मा दीतवार ने जयपुर रा जामडोली रा केशव विद्यापीठ मांय राख्या अखिल भारतीय राष्ट्रीय शैक्षिक महासंघ रा 9वां अधिवेशन रा उद्घाटन जळसा ने सम्बोधित कर रिया हा। इण मौके वे कया के पर्यटन रा नजरिया सूं राजस्थान पूरा देश मांय अनूठो है अर उण री सरकार विकसित राजस्थान 2047 रा विजन रे तैत अनुसंधान, नवाचार अर नौजवानां ने मजबूत करबा री दिशा मांय, दूरदर्शी नीति बणा र काम कर री है। मुख्यमंत्री जयपुर मांय ही एक दूजा सामाजिक कार्यक्रम मांय कया के राज्य सरकार उद्योग अर व्यापार ने बढावो देबा खातर बेहतर अर सुरक्षित वातावरण तैयार कर री है। मुख्यमंत्री कया के राज्य सरकार हस्तशिल्प रा हुनर ने सम्मान देबा रे सागे ही, प्रदेश मांय उद्योग अर व्यापार ने बढ़ावो देबा खातर हर भांत री कोशिश कर री है।