मुख्यमंत्री भजनलाल शर्मा सोमवारने जयपुर रा सांगानेर हलका मांय विकास रा 529 करोड़ रुप्या ऊं बत्ता खर्च वाळा केई कामां री सरूआत कीनी अर पूरा व्ह्या काम जनता ने सूंप्या। ईं मौके वे कह्यो के सांगानेर हलका ने आज करीब 700 करोड़ रुप्या रा विकास रा कामां री सौगात मिली है, ज्यां मांय यूनिटी मॉल, जयपुर मेट्रो अर गोपालपुरा बाईपास कने खम्भा माथे सड़क बणावण सरीखा खास काम शामिल है। श्री शर्मा कह्यो के बिजली ऊं जुड़्या करीब 100 करोड़ रुप्या रा काम करी ज्या है। मुख्यमंत्री कह्यो के प्रधानमंत्री नरेन्द्र मोदी रा जन्मदिन ऊं चलायी ज्या सेवा पखवाड़ा रे तैत गांवाई अर शहरी सेवा शिविरां मांय जनता रा भला रा कामां माथे खास ध्यान दियो जा रह्यो है, जिण ऊं अन्त्योदय रो संकल्प सांचो व्हे रह्यो है। वे जनता ऊं आं शिविरां रो बत्तो ऊं बत्तो फायदो लेवण री अपील कीनी।
मुख्यमंत्री सोमवार ने जयपुर शहर मांय तीन पुलिस थाणा रो ई उद्घाटन कीनो। ईं मौके वे कह्यो के राज्य मांय 65 रोमियो स्क्वाड बणायी ज्यी है, जो कॉलेजां, बाजारां, धार्मिक ठोड़ां, मॉल अर बस स्टेण्ड माथे अपराध रोकण सारू काम कर रही है।
मुख्यमंत्री भजन लाल शर्मा सोमवार ने जयपुर मांय त्रिवेणी नगर आरओबी ऊं ले र गुर्जर की थड़ी तांई खम्भां माथे बणबा वाळी सड़क रा काम री ई नींव रख्यी। दो किलोमीटर लम्बी चार लेन री आ सड़क बणावण रा काम माथे करीब 218 करोड़ रूप्या खर्च व्हेला।