मुख्यमंत्री भजनलाल शर्मा सोमवार ने जयपुर रा नाहरगढ़ हलका मांय टाइगर सफारी जनता ने सूंपी। ईं मौके मुख्यमंत्री नाहरगढ़ जैविक उद्यान मांय बाघ रा दो बच्चां रा नाम ई राख्या। मादा बाघ शावक ने ‘स्कंदी’ अर नर बाघ शावक ने ‘भीम’ नाम दियो ज्यो। मुख्यमंत्री जनता ने 2 ऊं 8 अक्टूबर तांई मनाया जा रह्या वन्य जीव सप्ताह री बधाई देता थकां कह्यो के जंगली जिनावरां अर कुदरत री हिफ़ाजत म्हां सगळा री जिम्मेदारी है। मुख्यमंत्री कह्यो के प्रदेश मांय जंगली जिनावरां री हिफाजत अर वां री तादाद बधावण माथे खास ध्यान दियो जा रह्यो है। प्रदेश मांय तीन नेशनल पार्क, 26 अभ्यारण्य, 36 कन्जर्वेशन रिजर्व अर 4 बायोलॉजिकल पार्क विकसित करी ज्या है। वे कह्यो के राज्य सरकार री कोशिशां ऊं बाघां री तादाद लगातार बध रही है अर प्रदेश मांय बाघां री तादाद करीब 130 व्हे ग्यी है। मुख्यमंत्री कह्यो के जयपुर विकास प्राधिकरण जयपुर जिला रा जीरोता मांय नगर वन अर नेवटा कने बायोडायवर्सिटी पार्क विकसित कीना है, ज्यां ऊं करीब 5 लाख लोगां ने फायदो मिलेला। कार्यक्रम मांय वन मंत्री संजय शर्मा कह्यो के टाईगर सफारी ऊं हलका मांय सैर-सपाटा ने बधावो मिलेला। ध्यानजोग है के राज्य सरकार 453 लाख रुप्या रा खर्च ऊं 30 हेक्टेयर हलका मांय टाइगर सफारी विकसित कीनी है। ईं टाइगर सफारी मांय 7 किलोमीटर लंबो सफारी ट्रैक विकसित करी जो है।