मुख्यमंत्री भजनलाल शर्मा घणी बिरखा रा असर वाळा सवाईमाधोपुर अर करौली ज़िला रो हवाई दौरो कर र हालात रो जायज़ो लीनो। ईं दौरान आपदा प्रबंधन मंत्री डॉ. किरोड़ी लाल मीणा ई वां सागे मौजूद रह्या। वे सवाईमाधोपुर ज़िला रा चकेरी, जड़ावता, अचनोटी, मैनपुरा, धनौली अर सूरवाल अर करौली ज़िला रा मंडरायल अर धौलपुर रा मोरोली, बरेलापुरा, भैसना, तगावली अर बाड़ी हलकां रो दौरो कीनो। दौरा पाछे वे अहलकारां ने भारी बिरखा री फेंट मांय आया लोगां ने बेगी मदद पूगावण रा हुकम दीना। मुख्यमंत्री चकचेनपुरा री हवाई पट्टी माथे जनता री समस्यावां सुणी अर लोगां ने हर संभव मदद रो भरोसो दिरायो।
रामजल सेतु परियोजना रो जिक्र करता थकां मुख्यमंत्री कह्यो के सरकार जनता री पाणी री जरूरत बेगी ई पूरी करण री कोशिश कर रही है। आपदा प्रबंधन मंत्री कह्यो के हलका मांय नुकसाण रो सर्वे करा र मुआवजो दिरायो जावेला।