मुख्यमंत्री भजनलाल शर्मा दीतवार ने दिल्ली प्रवास रे दौरान जोधपुर हाऊस मांय ‘एक पेड़ मां के नाम’ अभियान रे तैत बील रो पौधो लगायो। ई मौके वणा कह्यो के बील जस्या पौधा धार्मिक अर औषधीय दीठ ऊं महताऊ है। जैव विविधता ने ध्यान मांय राखता न्यारा-न्यारा प्रजातियां रा पौधा लगावणा चाहिजे। मुख्यमंत्री कह्यो के राजस्थान मांय ‘एक पेड़ मां के नाम’ अर ‘हरियाळो राजस्थान’ अभियान रे तैत ईं साल दस करोड़ पौधा लगावण रो लगस राख्यी ज्यो है। इण रे तैत अजै तांई साढे सात करोड़ ऊं बत्ती पौधा लगाया जा चुक्या है। वणा कह्यो के राज्य मांय हरियाळी तीज रे दिन अढाई करोड़ पौधा एक रिकॉर्ड बणायी ज्यो है, जो प्रदेशवासियां री पर्यावरण रे प्रति जाग अर प्रतिबद्धता ने दरसावे है। मुख्यमंत्री दीतवार ने नुवी दिल्ली मांय भाजपा रा राष्ट्रीय संगठन महामंत्री बी.एल. संतोष ऊं मिल्या। इण ऊं पैला, श्री शर्मा काले केन्द्रीय मंत्री अमित शाह अर हरदीप सिंह पूरी ऊं ई मिल्या। श्री शर्मा प्रदेश मांय कर्या जा रिया नवाचारां, विकास कामां अर जनहित योजनावां री जाणकारी दी। हरियाळो राजस्थान अभियान रे तैत राज्य री न्यारी-न्यारी ठोडां पौध रोपण कार्यक्रम व्ह्या। ई कड़ी मांय कोटपूतली-बहरोड़ रा पावटा मांय पीएमश्री जवाहर नवोदय विद्यालय मांय एक पेड़ मां के नाम पौध रोपण कार्यक्रम व्ह्यो। ई मौके जननुमाइंदा, शिक्षक अर पढेसर घणी तादाद मांय पौधा लगाया। जोधपुर मांय रक्षा प्रयोगशाला मांय दीतवार ने मेगा वृक्षारोपण अभियान रा दूजा चरण री सरूआत व्ही। अभियान मांय कार्मिकां अर वां रा पिरवार रा सदस्यां बढ-चढने हिस्सो लियो। साथे ई लगायी ज्या पौधां री हिफाजत रो ई संकल्प लियो।