मुख्यमंत्री भजनलाल शर्मा झालावाड़ ज़िला रा मनोहरथाना री सरकारी स्कूल मांय व्ह्या हादसा री आला दर्जा री जांच रा हुकम दीना है। मुख्यमंत्री कह्यो के ईं हादसा रा ज़िम्मेदार लोगां रे खिलाफ करड़ी कार्रवाई करी जावेला। वे कह्यो के प्रदेश री कोई स्कूल जर्जर हालत मांय नी व्हेवणी चाहिजे। ईं बीचे हादसा मांय मरण वाळा री तादाद बध र सात व्हे ग्यी है। झालावाड़ रा एस.पी. अमित कुमार आकाशवाणी ने बतायो के पीपलोदी गांव री सरकारी स्कूल मांय शुक्रवार ने संवारे छत पड़ जावण व्ह्या हादसा मांय ज़ख्मी 12 बच्चां रो झालावाड़ मेडिकल कॉलेज मांय ईलाज चाल रह्यो है जद के नौ बच्चा दूजा अस्पतालां मांय भर्ती है। घणा ज़ख्मी दो बच्चां ने आईसीयू मांय भर्ती करी ज्या है। शिक्षा मंत्री मदन दिलावर कह्यो के फिलहाल ज़ख्मी बच्चां रो टेमसर ईलाज करावण माथे खास ध्यान है। वे कह्यो के मामला री पूरी जांच करायी जावेला। शिक्षा मंत्री बतायो के ईं मामला मांय पांच अध्यापकां अर प्रबोधक ने मुअत्तल कर दिया ज्या है। केन्द्रीय शिक्षा मंत्री धर्मेन्द्र प्रधान ई मुख्यमंत्री भजन लाल शर्मा अर शिक्षा मंत्री मदन दिलावर ने फोन कर र राहत रा कामां अर ज़ख्मी बच्चां रा ईलाज री जाणकारी लीनी। राष्ट्रपति द्रौपदी मुर्मू अर प्रधानमंत्री नरेन्द्र मोदी हादसा माथे गहरो दुःख जतायो है। वे दुःखी पिरवारां सारू सहन शक्ति री कामना करता थकां ज़ख्मी बच्चां रे बेगा ई ठीक व्हेवण री प्रार्थना कीनी। पैली वाळा मुख्यमंत्री वसुंधरा राजे अर अशोक गहलोत समेत कई नेता स्कूल हादसा माथे दुःख जतायो है।